BAKI,VOA, Orxan Qədirzadə

İraqın paytaxtı Bağdadda 49 yaşlı amerikalı jurnalist Şelli Kittlson naməlum şəxslər tərəfindən qaçırılıb. Çərşənbə axşamı axşam saatlarında baş verən hadisədən sonra jurnalistdən heç bir xəbər alınmayıb. Məsələ ilə bağlı araşdırma aparan təhlükəsizlik ekspertləri Kittlsonun İrandanyönlü "Kataib Hizbullah" qruplaşması tərəfindən oğurlandığını ehtimal edirlər.

İraq hökumətinin təhlükəsizlik qüvvələri jurnalistin qaçırılmasında iştirak edən sürücülərdən birini təqib edərək saxlamağa nail olsalar da, hələlik jurnalistin dəqiq yeri barədə məlumat əldə edilməyib. Əməliyyat qrupları əsas diqqəti Bağdadın cənub rayonlarına yönəldiblər. Qruplaşmanın hər hansı fidyə tələb edib-etmədiyi və ya siyasi şərtlər irəli sürdüyü hələlik qeyri-müəyyən olaraq qalır.

Baxmayaraq ki, ABŞ hökuməti rəsmi olaraq hadisə ilə bağlı susqunluğunu qoruyur, diplomatik kanallardan sızan məlumatlara görə, Vaşinqton İraq hökuməti vasitəsilə qruplaşmaya sərt ultimatum göndərib. Bildirilir ki, əgər jurnalist çərşənbə günündən etibarən 48 saat ərzində azad edilməzsə, ABŞ ordusu "çox kəskin cavab" addımları atacaq. Bu xəbərdarlıq ABŞ-ın Bağdad səfirliyinin yaxın 24-48 saat ərzində paytaxtın mərkəzində terror hücumları ola biləcəyi barədə yaydığı bəyanatla üst-üstə düşür.

ABŞ ordusu son bir neçə həftə ərzində İraqda Xalq Səfərbərlik Qüvvələrinin (PMF) mövqelərinə zərbələr endirməkdə davam edir. Jurnalistin qaçırılması onsuz da gərgin olan vəziyyəti daha da mürəkkəbləşdirib.