BAKI,VOA, Fərid Mikayılov

İsrailin Baş naziri Benyamin Netanyahu müharibə fonunda qəbul edilən yeni dövlət büdcəsi ilə bağlı açıqlama verib.

VOA xəbər verir ki, Netanyahu rəsmi “X” hesabında paylaşdığı məlumatda bildirib ki, yeni büdcə təhlükəsizlik, sosial rifah və iqtisadi inkişaf istiqamətlərində mühüm addımları əhatə edir.

Baş nazir qeyd edib ki, büdcə çərçivəsində təhlükəsizlik sahəsinə əlavə təxminən 8,6 milyard ABŞ dolları ayrılıb və bu vəsait ordunun və müdafiə sisteminin gücləndirilməsinə yönəldiləcək.

Paylaşımda həmçinin Qəzza ətrafı və şimal yaşayış məntəqələrinin bərpası üçün əlavə 1,35 milyard ABŞ dolları, ehtiyatda xidmət edən hərbçilərə isə 1,6 milyard ABŞ dolları dəstək nəzərdə tutulduğu vurğulanıb.

Netanyahu əlavə edib ki, təhsil sektoruna təxminən 1,8 milyard ABŞ dolları, səhiyyə sisteminə isə 1,15 milyard ABŞ dolları əlavə maliyyə ayrılıb. Sosial müdafiə sahəsinə yönəldilən vəsait təxminən 480 milyon ABŞ dolları, nəqliyyat infrastrukturuna isə 2 milyard ABŞ dolları səviyyəsində qiymətləndirilir.

Bundan başqa, vergi güzəştləri və bank sektorunda rəqabəti artıracaq islahatların həyata keçirilməsi, eləcə də süni intellekt və yüksək texnologiyalar sahəsinə 1,35 milyard ABŞ dolları həcmində investisiya proqramı planlaşdırılır.

Baş nazir bildirib ki, bu büdcə həm təhlükəsizliyin möhkəmləndirilməsinə, həm də ölkənin iqtisadi inkişafının davam etdirilməsinə xidmət edir.