BAKI,VOA

Səudiyyə Ərəbistanının vəliəhdi, Baş nazir Şahzadə Məhəmməd bin Salman bin Əbdüləziz Ukrayna Prezidenti Volodimir Zelenski ilə regional və beynəlxalq prosesləri müzakirə edib. Görüşün əsas mövzusunu Yaxın Şərqdəki hərbi eskalasiya və Ukrayna böhranındakı son vəziyyət təşkil edib.

VOA xəbər verir ki, Səudiyyə Ərəbistanı Rəsmi Xəbər Agentliyinin (SPA) cümə günü səhər saatlarında yaydığı məlumata görə, Ciddədə baş tutan görüşdə Şahzadə Məhəmməd bin Salman və Prezident Zelenski iki ölkə arasındakı ikitərəfli münasibətləri nəzərdən keçiriblər.

Görüşün yüksək səviyyəli iştirakçıları

Görüşdə Səudiyyə Ərəbistanı tərəfindən dövlət naziri, Nazirlər Şurasının üzvü və milli təhlükəsizlik müşaviri Dr. Musaid əl-Aiban, ətraf mühit, su və kənd təsərrüfatı naziri mühəndis Əbdürrəhman əl-Fadli, Baş Kəşfiyyat İdarəsinin rəisi Xalid əl-Humaydan və Səudiyyə Ərəbistanının Ukraynadakı səfiri Məhəmməd əl-Bərəkə iştirak ediblər.

Ukrayna tərəfindən isə Milli Təhlükəsizlik və Müdafiə Şurasının katibi Rustem Umerov, Prezident Ofisi rəhbərinin birinci müavini Serhiy Kislitsa, Silahlı Qüvvələrin Baş Qərargah rəisi general-leytenant Andrey Hnatov, Ukraynanın Səudiyyə Ərəbistanındakı səfiri Anatoli Petrenko və Milli Təhlükəsizlik və Müdafiə Şurası katibinin müavini David Aloyan iştirak ediblər.

Ukrayna Prezidenti "X" (keçmiş Twitter) hesabında paylaşdığı mesajda: "Səudiyyə Ərəbistanına gəldim. Mühüm görüşlər planlaşdırılıb. Dəstəyi yüksək qiymətləndiririk və təhlükəsizliyi təmin etmək üçün bizimlə işləməyə hazır olanları dəstəkləyirik".-deyə bildirib.

Ukraynadan Səudiyyəyə tam dəstək

Qeyd edək ki, Prezident Zelenski bu ay Şahzadə Məhəmməd bin Salmanla telefon danışığı zamanı Ukraynanın Səudiyyə Ərəbistanına qarşı həyata keçirilən "açıq İran təcavüzlərini" qınadığını ifadə etmişdi. O, Kiyevin öz ərazilərini qorumaq üçün gördüyü bütün tədbirlərdə Ər-Riyad ilə həmrəy olduğunu və onun yanında dayandığını bir daha vurğulayıb.