BAKI,VOA, Nailə Babazadə

Küveyt Dövlət Neft Şirkəti (KNPC) ölkənin strateji əhəmiyyətli obyektlərindən biri olan Mina əl-Əhmədi neft emalı zavodunun pilotsuz uçuş aparatları (PUA) tərəfindən hücuma məruz qaldığını elan edib. Hücum nəticəsində zavodun ərazisində yanğın baş verdiyi bildirilir.

VOA xəbər verir ki, şirkətin rəsmi bəyanatında qeyd olunur ki, hadisə zamanı hər hansı xəsarət alan olmayıb. Lakin təhlükəsizlik tədbirləri çərçivəsində və yanğının genişlənməsinin qarşısını almaq məqsədilə neft emalı zavodundakı bəzi istehsalat vahidlərinin fəaliyyəti müvəqqəti olaraq dayandırılıb.

Hazırda yanğınsöndürmə briqadaları və fövqəladə hallar briqadaları hadisə yerində işlərini davam etdirir. Bu hücum regionda davam edən hərbi eskalasiya fonunda Küveytin enerji infrastrukturuna vurulan ilk ciddi zərbələrdən biridir. Mütəxəssislər bu cür hücumların qlobal neft bazarında qiymət stabilliyinə təsir edə biləcəyi barədə xəbərdarlıq edirlər.

Qeyd edək ki, Mina əl-Əhmədi zavodu Küveytin ən böyük neft emalı müəssisələrindən biri hesab olunur və ölkənin neft ixracatında mühüm rol oynayır.