BAKI, VOA , Nailə Babazadə

Qətər İranın bölgə ölkələrinə qarşı hücumlarını "rəhmsiz" adlandırıb və Tehranın bütün qırmızı xətləri keçdiyini bildirib.

VOA xəbər verir ki, bu barədə Qətər Xarici İşlər Nazirliyi rəsmi bəyanat yayıb.

"Qətər son iki gün ərzində Səudiyyə Ərəbistanı və Birləşmiş Ərəb Əmirliklərindəki (BƏƏ) enerji obyektlərinin İran tərəfindən hədəf alınmasını ən kəskin ifadələrlə pisləyir". - deyə bəyanatda qeyd edilir.

Açıqlamada qeyd olunub ki, sözügedən hücumlar "beynəlxalq hüququn açıq şəkildə pozulmasıdır və qlobal enerji təhlükəsizliyi, gəmiçilik və ətraf mühit üçün ciddi təhlükə yaradır".

İranın bölgə ölkələrinə qarşı amansız hücumlarının mülki şəxsləri, mülki infrastrukturu və həyati əhəmiyyətli obyektləri hədəf alaraq "bütün qırmızı xətləri keçdiyi" vurğulanan bəyanatda, bölgəni bu əsassız hücumların nəticələrindən qorumağın, regional və beynəlxalq təhlükəsizliyi, sabitliyi yenidən bərpa etmək üçün gərginliyi azaltmağın vacibliyi qeyd edilib.

Bəyanatda həmçinin bildirilib ki, Qətər qardaş ölkələrlə tam həmrəydir və onların suverenliyini, təhlükəsizliyini, ərazi bütövlüyünü qorumaq üçün gördükləri bütün tədbirləri dəstəkləyir.