BAKI,VOA, Fərid Mikayılov

Səudiyyə Ərəbistanının xarici işlər naziri Faysal bin Fərhan İranı Körfəz və ərəb ölkələrinə qarşı hücumları dərhal dayandırmağa çağırıb və bu davranışın ciddi nəticələrinin olacağını bildirib.

VOA xəbər verir ki, Riyadda keçirilən görüşdən sonra çıxış edən nazir İranın hərəkətlərini qəti şəkildə pisləyərək regionda gərginliyin artmasının qarşısını almaq üçün birgə fəaliyyətin vacibliyini vurğulayıb.

Nazir bildirib ki, İranın son hücumları nəticəsində ölkələr arasında mövcud olan minimal etimad belə tamamilə sarsılıb. O qeyd edib ki, Səudiyyə Ərəbistanı və region ölkələri siyasi, iqtisadi və diplomatik vasitələrdən istifadə edərək bu hücumların dayandırılmasına nail olmağa çalışacaq.

Faysal bin Fərhan İranın paytaxt Ər-Riyadı hədəfə almasını diplomatik proseslərə açıq mesaj kimi qiymətləndirib və bu addımın təsadüfi olmadığını bildirib. Onun sözlərinə görə, İran qonşularına təzyiq göstərməyə çalışır, lakin bu yanaşma nəticə verməyəcək.

Nazir vurğulayıb ki, ölkəsi təzyiqlərə boyun əyməyəcək və zərurət yaranacağı təqdirdə hərbi addımlar da daxil olmaqla cavab tədbirləri nəzərdən keçirilə bilər.

O, həmçinin Körfəz ölkələrində mülki obyektlərin, o cümlədən enerji infrastrukturu və yaşayış məntəqələrinin hədəfə alınmasını kəskin tənqid edib və İranın bu hücumları ABŞ maraqları ilə əsaslandırmasını “zəif arqument” kimi qiymətləndirib.

Nazir əlavə edib ki, Körfəz ölkələri öz ərazilərinin digər dövlətlərə qarşı hücum platformasına çevrilməsinə imkan verməyəcək və regional sabitliyin qorunması üçün koordinasiyalı fəaliyyət davam etdiriləcək.