BAKI, VOA, Nailə Babazadə

İsrail ordusunun martın 2-dən etibarən Livana qarşı başlatdığı intensiv hücumlar davam edir. Bu gün səhər saatlarından bəri həyata keçirilən hava zərbələri nəticəsində həyatını itirənlərin sayı 12-yə yüksəlib.

VOA xəbər verir ki, Livanın rəsmi NNA agentliyinin məlumatına görə, ölkənin cənub, şərq və şimal bölgələri ağır bombardmanlara məruz qalıb.

Hücumların coğrafiyası genişlənməkdədir. Nəbatiyə vilayətinin Şərqi Zavter qəsəbəsində bir ailənin 3 üzvü, Kefur qəsəbəsində isə 2 nəfər həlak olub. Ölkənin cənubundakı Sur şəhərində hərəkətdə olan avtomobilin hədəf alınması nəticəsində 3 nəfər ölüb. Oxşar hadisə şərqi Livanın Zahlə bölgəsində də baş verib; avtomobilə endirilən zərbə 2 nəfərin həyatına son qoyub, daha 2 nəfər isə yaralanıb.

Livanın şimalındakı əl-Bədavi Fələstin qaçqın düşərgəsinə endirilən zərbə nəticəsində "Hamas" rəhbərlərindən biri olan Vəsim Atallah və həyat yoldaşı həlak olub, qızları isə yaralanıb. Bu, İsrailin hərbi əməliyyatları Livanın dərinliklərinə və qaçqın düşərgələrinə qədər genişləndirdiyini göstərir.

İsrailin hücumlarına cavab olaraq "Hizbullah" qruplaşması İsrailin şimalındakı İtsba Cəlil bölgəsinə bir sıra raket zərbələri endirdiyini açıqlayıb. İsrail ordusu ölkənin şimalında həyəcan siqnallarının işə düşdüyünü təsdiqləyib.

Livan Səhiyyə Nazirliyinin 4 mart tarixinə olan son məlumatına görə, martın 2-dən bəri davam edən hücumlarda ümumilikdə 72 nəfər həlak olub, 437 nəfər isə yaralanıb. İsrail ordusu Beyrutu həm havadan, həm də dənizdən hədəf alarkən, quru əməliyyatlarını daha da genişləndirmək qərarına gəlib.