BAKI, AzerVoice
Pakistan təhlükəsizlik qüvvələri bazar günü bəyan edib ki, ölkənin cənub-qərbində yerləşən Bəlucistan əyalətinin müxtəlif bölgələrində iki gündən az müddət ərzində 145 yaraqlını məhv ediblər. Bu hadisə Pakistanın regionda ən təhlükəli zorakılıq dalğalarından biri ilə üzləşdiyi bir vaxta təsadüf edir.
AzerVoice "Bloomberg" agentliyinə istinadən xəbər verir ki, Bəlucistan əyalətinin baş naziri Sərfəraz Buqti jurnalistlərə açıqlamasında deyib: "Biz 40 saat ərzində 145 terrorçunu zərərsizləşdirməyə nail olduq".
Buqti həmçinin zorakılıq hadisələri zamanı 31 mülki şəxsin və 17 təhlükəsizlik qüvvəsi əməkdaşının həlak olduğunu bildirib.
"Cənubi Asiya Terrorizm Portalı"nın məlumatlarına görə, bu Cənubi Asiya ölkəsi keçən ildən bəri silahlı qruplaşmaların hücumlarının artmasına şahid olur. Belə ki, bu hücumlar nəticəsində ölkə üzrə ölənlərin sayı 3967 nəfərə çatıb ki, bu da 2015-ci ildən bəri ən yüksək göstəricidir.