BAKI, AzerVoice, Orxan Qədirzadə

İsrail Suriya ordusunun YPG/SDQ-yə qarşı həyata keçirdiyi əməliyyatlarla bağlı ehtiyatlı mövqe sərgilədiyini və bu məsələdə ABŞ-la koordinasiyaya üstünlük verdiyini açıqlayıb.

AzerVoice xəbər verir ki, İsrail Prezidenti İsaak Hersoq İsveçrənin Davos şəhərində keçirilən Dünya İqtisadi Forumunda çıxışı zamanı Suriyadakı vəziyyətlə bağlı sualları cavablandırıb. O bildirib ki, İsrailin əsas məqsədi Suriya ilə sakit, təhlükəsiz və dinc yanaşı yaşamaqdır. Hersoq vurğulayıb ki, İsrail Suriya xalqı üçün daha yaxşı gələcəyin təmin olunmasını arzulayır və bu istiqamətdə ölkə rəhbərliyinə uğurlar diləyir.

Suriyadakı inkişaflara münasibət bildirən İsrail Prezidenti deyib ki, rəsmi Tel-Əviv baş verənləri diqqətlə izləyir. Onun sözlərinə görə, xüsusilə druz müttəfiqlərin təhlükəsizliyi ilə bağlı ciddi narahatlıqlar mövcuddur. Hersoq qeyd edib ki, Suriyadan daxil olan məlumatlar həm druz icması, həm də kürd əhalinin vəziyyəti ilə bağlı ciddi risklərdən xəbər verir.

Yeni Suriya hakimiyyətinin etibarlılığı ilə bağlı suala cavab verən Hersoq bildirib ki, İsrail bu məsələdə ABŞ-ın mövqeyinə önəm verir. O vurğulayıb ki, amerikalı tərəfdaşlar Suriya Prezidenti Əhməd əş-Şaraa və onun komandası ilə mütəmadi təmasdadır və region ölkələrinin mövqeləri də nəzərə alınır. İsrail Prezidenti əlavə edib ki, proseslərin real nəticələr verməsi əsas meyar olmalıdır.

Bu bəyanatlar ABŞ-ın Suriya siyasətində dəyişikliklər fonunda səsləndirilib. ABŞ-ın Suriya üzrə nümayəndəsi Tom Barak daha əvvəl Vaşinqtonun YPG/PKK ilə əməkdaşlığa son verdiyini, İŞİD-lə mübarizədə SDQ-nin rolunun başa çatdığını və qurumun Şam hakimiyyəti ilə inteqrasiya olunmalı olduğunu açıqlamışdı. ABŞ rəsmisi həmçinin Şam administrasiyasının təhlükəsizlik məsuliyyətini üzərinə götürməyə hazır olduğunu bildirmişdi.