BAKI, AzerVoice, Nailə Babazadə

Livan Prezidenti Cozef Aun və Baş nazir Nəvaf Salamın silahların yalnız dövlət nəzarətində olması planını Litani çayının şimalına qədər genişləndirmək qərarı Hizbullahın sərt reaksiyası ilə qarşılanıb.

AzerVoice xəbər verir ki, Hizbullahın Siyasi Şurasının sədr müavini Mahmud Qəmati dövlət televiziyasına müsahibəsində hökumətin bu addımını ölkəni xaos və qeyri-sabitliyə sürükləmək cəhdi kimi qiymətləndirib. O, silahların təhvil verilməsi ilə bağlı təzyiqlərin qəbuledilməz daxili vəziyyət yaradacağını və hətta vətəndaş müharibəsinə səbəb ola biləcəyini vurğulayıb. Qəmati bildirib ki, Hizbullah silahlarının taleyi müzakirə olunmazdan əvvəl İsrail Livanın suverenliyini pozmağı dayandırmalı və işğal etdiyi məntəqələrdən çəkilməlidir.

Hizbullahın təhdidlərinə cavab verən Livanın sənaye naziri Co İssa Əl-Xuri isə vətəndaş müharibəsi ehtimalının qeyri-legitim silahlı qrupla dövlətin rəsmi ordusu arasında ola bilməyəcəyini deyib. O, regionun inkişaf etdiyi bir dövrdə Livanın geriyə getdiyini və ordunun silahları toplamaq planının martın sonunadək tam başa çatmalı olduğunu qeyd edib. Nazir xatırladıb ki, vaxtilə ölkənin ən güclü milis qrupu olan "Livan Qüvvələri" silahlarını təhvil verərək dövlət quruculuğuna dəstək verib və eyni addım bu gün Hizbullahdan gözlənilir.

Eyni zamanda, Livanın xarici işlər naziri Yusif Racinin Hizbullahın silahlarını tam təhvil verməməsinin İsrailə hücumlar üçün bəhanə yaratdığı barədə açıqlaması "Şiə tandemi"nin (Amal və Hizbullah) kəskin etirazına səbəb olub. Millət vəkilləri naziri dövlət suverenliyinə xələl gətirməkdə və İsrailin təcavüzünə bəraət qazandırmaqda ittiham edərək onun istefasını tələb ediblər. Hökumət daxilindəki bu dərin çat Livanın gələcək sabitliyi ilə bağlı ciddi narahatlıqlar yaradır.