BAKI, AzerVoice, Orxan Qədirzadə
Səudiyyə Ərəbistanının müdafiə naziri, şahzadə Xalid bin Salman Cənub Keçid Şurasını (CKŞ) Yəmənin Hadramaut və əl-Mehra vilayətlərində yerləşən hərbi düşərgələrdən qüvvələrini çıxarmağa və obyektləri sülh yolu ilə “Vətən Qalxanı” qüvvələrinə və yerli hakimiyyət orqanlarına təhvil verməyə çağırıb.
AzerVoice xəbər verir ki, nazir bu çağırışı Yəmən xalqına ünvanladığı müraciətdə səsləndirib. O bildirib ki, mövcud həssas mərhələdə ağıl, müdriklik, ictimai maraqlar və birlik ön plana çıxmalı, Səudiyyə Ərəbistanı–Birləşmiş Ərəb Əmirliklərinin vasitəçilik səylərinə cavab olaraq gərginliyin azaldılması istiqamətində addımlar atılmalıdır.
Xalid bin Salman qeyd edib ki, Yəmənin legitim hakimiyyətinin müraciəti əsasında Krallıq və müttəfiq ölkələr “Qətiyyətli Fırtına” və “Ümidin Bərpası” əməliyyatları çərçivəsində geniş səylər göstərərək dövlətin ölkə ərazisində nəzarətini bərpa etməyə çalışıb. Onun sözlərinə görə, cənub vilayətlərinin azad edilməsi bu prosesdə mühüm rol oynayıb.
Nazir vurğulayıb ki, Səudiyyə Ərəbistanı cənub məsələsini dar siyasi çərçivədə deyil, ədalətli siyasi məsələ kimi qiymətləndirib və bu problemin güc tətbiqi ilə deyil, dialoq və konsensus yolu ilə həllini dəstəkləyib. Bu məqsədlə Ər-Riyadda bütün Yəmən siyasi tərəflərinin iştirakı ilə konfrans təşkil edilib, Riyad Sazişi isə cənubluların hakimiyyət strukturlarında təmsil olunmasını təmin edib.
O, həmçinin hakimiyyətin ötürülməsi ilə bağlı qərarın cənubluların dövlət institutlarında fəal iştirakına şərait yaratdığını, tərəfdaşlıq prinsipini möhkəmləndirdiyini bildirib. Xalid bin Salman əlavə edib ki, Krallıq iqtisadi dəstək, inkişaf və humanitar layihələr vasitəsilə Yəmən xalqının üzləşdiyi çətinliklərin azaldılmasına töhfə verib.
Nazir dekabrın əvvəlindən Hadramaut və əl-Mehra vilayətlərində baş verən hadisələrin daxili birliyi zəiflətdiyini, təhlükəsizlik çağırışları fonunda ümumi səylərə zərər vurduğunu və cənub məsələsinə mənfi təsir göstərdiyini qeyd edib.
Bununla yanaşı, o, bir sıra cənub siyasi qüvvələri və ictimai xadimlərin gərginliyin azaldılmasına dəstək verdiyini, ictimai sabitliyin qorunmasına töhfə verdiyini və bölgəni yeni qarşıdurmalardan uzaq saxlamağa çalışdığını vurğulayıb.
Müraciətin sonunda Xalid bin Salman bildirib ki, cənub məsələsi Yəmən üzrə istənilən ümumi siyasi həll prosesinin ayrılmaz hissəsi olaraq qalacaq və bu problem yalnız qarşılıqlı etimad, razılaşmaların yerinə yetirilməsi və dialoq yolu ilə həll edilməlidir.
Bu arada, Yəməndə legitimliyi dəstəkləyən Koalisiya Qüvvələrinin rəsmi nümayəndəsi, general Turki əl-Maliki bəyan edib ki, Səudiyyə Ərəbistanı və BƏƏ-nin vasitəçilik səylərinə zidd olan istənilən hərbi hərəkətə dərhal reaksiya veriləcək. O bildirib ki, bu tədbirlər Yəmən Prezident Şurasının sədri Rəşad əl-Əliminin müraciəti əsasında mülki əhalinin təhlükəsizliyini təmin etmək məqsədi daşıyır.