BAKI,AzerVoice, Nailə Babazadə
Birləşmiş Millətlər Təşkilatının (BMT) Livandakı Sülhməramlı Qüvvələri (UNIFIL) bəyan edib ki, İsrail ordusunun dünən Livanın cənub bölgələrinə endirdiyi hava zərbələri BMT Təhlükəsizlik Şurasının 1701 saylı qətnaməsinin pozulmasıdır.
AzerVoice xəbər verir ki, UNIFIL-in yaydığı yazılı açıqlamada bildirilib ki, İsrail qüvvələri Livanın cənubunda yerləşən Caba, Mahruna, Baraşit və əl-Məcədil yaşayış məntəqələrinə hava hücumları həyata keçirib.
Açıqlamada qeyd olunub ki, bu hücumlar 1701 saylı qətnamənin pozulması deməkdir və tərəflərə 2024-cü ilin noyabrında əldə olunan atəşkəsə əməl etmələri çağırışı edilib.
Qeyd edək ki, Livanda vətəndaş müharibəsinin başlamasından sonra İsrail 1978-ci ildə Livan ərazisinə daxil olaraq Cənubi Livanı işğal edib. Həmin il BMT Təhlükəsizlik Şurası İsrailə qoşunlarını Livandan çıxarmaq çağırışı edib.
Livanın müraciəti əsasında, İsrail qüvvələrinin çıxarılmasını təsdiqləmək, bölgədə sülh və təhlükəsizliyi bərpa etmək və Livan hökumətinin ölkənin cənubu üzərində nəzarətini gücləndirməsinə dəstək vermək üçün 19 mart 1978-ci ildə UNIFIL yaradılıb.
Təhlükəsizlik Şurası 12 iyul 2006-cı ildə Livan ilə İsrail arasında başlayan müharibəyə son qoymağı nəzərdə tutan 1701 saylı qətnaməni 11 avqust 2006-cı ildə yekdilliklə qəbul edib.
Qətnamə İsrailin Mavi Xəttin gerisinə çəkilməsini, həmin xəttlə Litani çayı arasındakı bölgənin silahsızlaşdırılmasını və burada yalnız Livan ordusu ilə UNIFIL-ə aid silah və hərbi texnikanın yerləşdirilməsini nəzərdə tutur.