BAKI,AzerVoice

PKK terror təşkilatının Suriya qolu olan Suriya Demokratik Qüvvələri (SDQ) hökumətə bağlı silahlı dəstələri ölkənin şimal və şərqində yeni hücumlar həyata keçirməkdə ittiham edib. Qüvvələrin açıqlamasına görə, Deyr Hafər ətrafında baş verən toqquşmalarda 7 döyüşçü yaralanıb.

SDQ- bildirilib ki, hökumət qüvvələrinə məxsus “intihar dronu” hərbi avtomobili hədəfə alıb, nəticədə 3 döyüşçü yüngül yaralanıb. Ardınca daxili təhlükəsizlik qüvvələrinin patrulunu hədəfə alan PUA hücumu nəticəsində daha 4 nəfər yaralanıb.

Təşkilat qeyd edib ki, bölgədəki yaşayış məhəllələri də artilleriya atəşinə məruz qalıb. SDQ bu hücumları “mülki əhalinin həyatına birbaşa təhdid və qorxu yaymaq məqsədi daşıyan” hərəkətlər kimi qiymətləndirib.

Bəyanatda vurğulanıb ki, bu cür təkrarlanan hücumlar “Suriyanın şimal və şərqində xaos yaratmaq və sabitliyi pozmaq” məqsədi güdür. SDQ rəhbərliyi isə bölgə təhlükəsizliyini qorumaq və sabitliyi təmin etməkdə qərarlı olduqlarını bildirib.

Dövlətlə inteqrasiya prosesi ləngiyir

Qeyd edək ki, mart ayında SDQ rəhbərliyi ilə Suriya hökuməti arasında dövlətin yeni qurumlarına inteqrasiya, sərhəd-keçid məntəqələrinin, neft yataqlarının və hava limanlarının hökumətə təhvil verilməsi barədə razılaşma imzalanmışdı. Razılaşmanın ilin sonuna qədər tam icrası planlaşdırılsa da, Suriya prezidenti Əhməd əl-Şəraa ötən ay bu prosesdə “gecikmə və ya süni maneələr” olduğunu bildirmişdi.