BAKI,AzerVoice, Fərid Mikayılov

İsrailin 14-cü telekanalının məlumatına görə, İsrail Qətərdə HƏMAS-ın bir sıra rəhbərlərini, o cümlədən Xalil əl-Həyə və Zahir Cəbarini vurub. İsrailin 12-ci kanalı isə hücumun həmçinin Xalid Məşələ də yönəldiyini bildirib.

14-cü kanalın verdiyi məlumata görə, israilli rəsmilər ordunun sui-qəsd cəhdinin nəticələrini gözlədiklərini bildiriblər. Qeyd olunub ki, hücumu qırıcı təyyarələr həyata keçirib.

Qətərin paytaxtı Dohada bir neçə partlayış səsi eşidilib, şəhərin mərkəzindən tüstü qalxdığı bildirilib. AzerVoice xəbər verir ki, şahidlər, hadisənin mərkəzi məhəllələrdən birində baş verdiyini təsdiqləyiblər. İsrail mediası yüksək rütbəli israilli rəsmiyə istinadla, Dohada baş verən partlayışların İsrailin HƏMAS rəhbərliyinə qarşı həyata keçirdiyi suiqəsd əməliyyatı olduğunu bildirib. İsrail ordusunun radio kanalı da açıqlamasında hücumu üstlənib.

“İsrail, Qətərdəki HƏMAS rəhbərliyini hədəf alıb. Əməliyyat HƏMAS liderliyinin ən yüksək səviyyəsini vurmaq məqsədi daşıyırdı”- deyə bildirib.

Qətər mərkəzli Əl-Cəzirə televiziyası isə HƏMAS mənbələrinə istinadla, hücumun təşkilatın atəşkəs üzrə danışıqlar heyətinə qarşı həyata keçirildiyini açıqlayıb.

Hadisənin dəqiq yeri və itkilər barədə hələlik rəsmi açıqlama verilməyib. Lakin mütəxəssislər bu hadisənin bölgədə onsuz da gərgin olan vəziyyəti daha da kəskinləşdirə biləcəyini bildirirlər.

İsrail mediası xəbər verir ki, Qətərin paytaxtına endirilən hava zərbəsi ABŞ-la koordinasiya olunub. Onların məlumatına görə, Tramp Qətərdəki HƏMAS rəhbərliyinə qarşı əməliyyata “yaşıl işıq” yandırıb.