BAKI, AzerVoice, Səməd Əyyubov
Yəmən hökumət mənbələrinin məlumatına görə, husilər bazar günü paytaxt Sənada BMT əməkdaşlarına qarşı yeni həbslər həyata keçiriblər.
AzerVoice xəbər verir ki, silahlı dəstələr beynəlxalq təşkilatların binalarına daxil olaraq bir neçə əməkdaşı saxlayıblar. Bu, son aylarda humanitar sahədə çalışanlara qarşı həyata keçirilən yeni həbslər dalğasının davamıdır.
Hazırda onlarla BMT əməkdaşı və beynəlxalq təşkilat nümayəndəsi husilərin nəzarətindəki həbsxanalarda saxlanılır, bəziləri isə artıq dörd ilə yaxındır ki, azadlıqlarından məhrumdurlar. Son həbslər, hərəkatın baş naziri Əhməd Rəhvinin və bir neçə nazirin İsrailin hava zərbəsi nəticəsində həlak olduğunu husilərin etiraf etməsindən sonra baş verib.
İranla müttəfiq olan husilərin yüzlərlə məcburi yoxa çıxma hadisəsinə görə məsuliyyət daşıdığını qeyd edən beynəlxalq hüquq təşkilatlarının hesabatları fonunda, bu addım hökumətin sərt reaksiyasına səbəb olub. Yəmən informasiya naziri Muammer əl-Eryani hadisəni BMT-yə və onun əməkdaşlarına qarşı “vəhşi hücum” adlandırıb.
Nazirin sözlərinə görə, husilər Sənada Ümumdünya Ərzaq Proqramının binasına basqın edərək iki əməkdaşı qaçırıblar, bir neçəsini isə içəridə saxlayıblar. Bundan əlavə, bəzi BMT əməkdaşları ev dustaqlığına məruz qalıb. Hücumun UNICEF-in mühafizəçilərinə də yönəldiyi, eləcə də əl-Hudeyda vilayətində oxşar həbslərin həyata keçirildiyi bildirilir.
BMT hadisələrlə bağlı hələlik rəsmi açıqlama verməyib. Əl-Eryani isə bu kampaniyanı “humanitar fəaliyyətlə məşğul olanlara qarşı təzyiq” adlandıraraq beynəlxalq hüququn kobud şəkildə pozulması kimi qiymətləndirib. O, təşkilatları ofislərinin müvəqqəti paytaxt Ədənə köçürülməsinə və beynəlxalq ictimaiyyəti BMT əməkdaşlarının təhlükəsizliyini təmin etmək üçün dərhal tədbir görməyə çağırıb. Nazir, həmçinin, husilərin terror təşkilatı kimi tanınmasını, onların maliyyə mənbələrinin kəsilməsini və bu istiqamətdə Avropa İttifaqı, Böyük Britaniya və digər ölkələrin konkret addımlar atmasını tələb edib.
Qeyd edək ki, Yəmən Milli Əsirlər və Qaçırılanlar İdarəsinin (hökumət qurumu) açıqlamasına görə, 2024-cü ilin iyunundan 2025-ci ilin avqustunadək husilər ümumilikdə 228 nəfəri qaçırıb və ya gizli saxlayıb. Onların arasında 71 BMT və beynəlxalq təşkilat əməkdaşı da var. Qurumun məlumatına görə, həbslər çox vaxt evlərə zorla basqın edilməklə həyata keçirilir, şəxslərin əmlakı müsadirə olunur, insanlar naməlum yerlərə aparılır və işgəncə altında çəkilmiş “etiraf” videoları yayımlanır.