BAKI, AzerVoice, Səməd Əyyubov

Kopenhagendə Fələstinə dəstək məqsədilə keçirilən nümayişdə 10 mindən çox insan iştirak edib.

AzerVoice xəbər verir ki, etirazçılar Qəzzadakı müharibənin dayandırılmasını və Danimarkanın Fələstin dövlətini tanımasını tələb ediblər.

Yürüşdə “Oxfam”, “Greenpeace”, “Amnesty International” kimi beynəlxalq təşkilatların yanaşı həmkarlar ittifaqları, siyasi partiyalar, incəsənət nümayəndələri və fəallar, o cümlədən ekofəal Qreta Tunberq də iştirak edib. Polis isə dəqiq iştirakçı sayına dair rəsmi məlumat verməyib.

Aksiyaya qatılanların çoxunu övladları ilə gələn ailələr təşkil edib. Onlar Danimarka parlamentinin qarşısında toplaşaraq bayraqlar qaldırıb, plakatlar tutublar və “Silah satışlarını dayandırın”, “Azad Fələstin”, “Danimarka soyqırıma yox deyir” şüarları səsləndiriblər.

Qeyd edək ki, Danimarka ənənəvi olaraq İsrailin tərəfdarı hesab olunur. Lakin hökumət ölkənin hazırda Avropa İttifaqına sədrliyindən istifadə edərək İsrail hökumətinə təzyiqlərin artırılmasına çalışacağını bildirib. Baş nazir Mette Frederiksen son açıqlamasında Qəzzadakı müharibənin “həddi aşdığını” deyib. Bununla belə, o, Danimarkanın yaxın vaxtlarda Fələstin dövlətini tanımağı planlaşdırmadığını da qeyd edib.