BAKI, AzerVoice

Fələstin Aİ-ni Qəzzada soyqırımı dayandırmaq üçün təcili tədbirlərə çağırıb.

AzerVoice xəbər verir ki, Fələstinin Xarici İşlər və Qürbətçilər naziri Farsin Ağabekian Şahin Avropa İttifaqını İsrailin Qəzza zolağında həyata keçirdiyi hücumları dayandırmaq üçün daha sərt və təxirəsalınmaz addımlar atmağa çağırıb.

Fələstin Xarici İşlər Nazirliyinin açıqlamasına görə, nazir Şahin bu çağırışı Avropa İttifaqının Yaxın Şərq Sülh Prosesi üzrə xüsusi nümayəndəsi Kristof Bigotla Ramallahda keçirdiyi görüş zamanı səsləndirib. Görüşdə Qəzzada baş verən insan itkiləri, köçkünlük, aclıq və fəlakət səviyyəsində dağıntılar müzakirə olunub.

Şahin bildirib ki, İsrailin gömrük və vergi gəlirlərini kəsməsi, yaşayış məntəqələrinə və qaçqın düşərgələrinə hücumları Fələstin hökumətinin fəaliyyətinə ciddi zərbə vurur. Onun sözlərinə görə, Fələstin xalqı sistematik şəkildə məhv edilir və bu vəziyyətə beynəlxalq ictimaiyyət, xüsusilə də Aİ səssiz qalmamalıdır.

Nazir Aİ-ni yalnız bəyanatlarla kifayətlənməməyə, soyqırımın qarşısını almaq üçün təsirli siyasi və diplomatik alətlərdən istifadə etməyə, eləcə də Qəzzada Fələstin hökumətinin məsuliyyət daşıya bilməsi üçün bütün tərəflərlə koordinasiyalı şəkildə işləməyə çağırıb.

Qeyd edək ki, görüş zamanı Kristof Bigot da Aİ-nin Fələstin dövlətini və hökumətini dəstəklədiyini vurğulayıb. O, qurumun iki dövlətli həll prinsipinə sadiqliyini bir daha təsdiqləyərək, davamlı sülh üçün bu çərçivədə əməkdaşlığın vacibliyini bildirib.