BAKI, AzerVoice

İordaniya xarici işlər naziri Əyman əs-Səfədi İsrail Silahlı Qüvvələrinin Suriyanın ərazisində etdiyi hücumları əsassız adlandıraraq, İsraili bütün bölgədə gərginliyi saxlamaqda ittiham edib.

AzerVoice xəbər veeir ki, bu barədə əs-Səfədi Ankarada Suriya və Türkiyə XİN-ləri ilə görüşdən sonra keçirilən mətbuat konfransında bildirib.

“İsrailin Suriyaya qarşı həyata keçirdiyi hücumlar heç bir əsas olmadan Suriyadakı sabitliyi pozur və bölgədə gərginliyin davam etdirir” - deyə, o qeyd edib.

"Biz İsrailin Suriyanın ərazisinə etdiyi hücumları pisləyirik. İsrailin Suriya daxilindəki məsələlərə müdaxilə etməsi qəbuledilməzdir” - deyə, o əlavə edib.

Xatırladaq ki, Suriyada ötən ilin dekabrında baş vermiş hakimiyyət dəyişikliyindən sonra İsrail bu ölkənin müxtəlif bölgələrinə zərbələr endirməyə başlayıb. Həmin ay İsrail, 1967-ci ilə qədər Suriyaya məxsus olmuş və 1981-ci ildə BMT Təhlükəsizlik Şurası tərəfindən qeyri-qanuni elan edilən Colan təpələrində əlavə hərbi qüvvələr yerləşdirib, həmçinin 1974-cü ildən bəri İsrail və Suriya arasında demilitarizasiya edilmiş tampon zonanı da nəzarətə götürüb. Daha sonra İsrail hökuməti Suriyanın cənubunda 15 kilometrlik “nəzarət zonası” və 50 kilometrlik “təsir zonası” yaratmaq niyyətində olduğunu açıqlayıb. Bu zonaların məqsədi bölgənin demilitarizasiyası kimi göstərilir.

Bu ilin aprel ayının sonunda Dəməşq ətrafındakı dürzi icmasının yaşadığı bölgələrdə silahlı qarşıdurmalar baş verib, Sahnaya yaşayış məntəqəsi hücuma məruz qalıb. Bu hadisələr fonunda İsrail aviasiyası Dəməşq ətrafına, eləcə də Latakiya, Həma və Dəraa vilayətlərindəki obyektlərə hava zərbələri endirib. Suriya Xarici İşlər Nazirliyi isə bu müdaxiləni qınayıb.