BAKI,AzerVoice

İran qazı fasiləsiz olaraq Türkiyəyə çatdırılır.

AzerVoice xəbər verir ki, bu barədə Türkiyənin Energetika və Təbii Sərvətlər naziri Alparslan Bayraktar bildirib.

O bildirib ki, İran, Türkiyənin əsas təbii qaz təchizatçılarından biri olaraq, qaz tədarükünü dayanmadan davam etdirir.

Nazir bu açıqlamanı Sankt-Peterburqda keçirilən Beynəlxalq İqtisadi Forum çərçivəsində “Qlobal enerji bazarı: İstehsalçılar və istehlakçılar arasında tarazlıq” adlı panel zamanı verib.

Bayraktar bölgədəki müharibələr, pandemiya və təchizat zənciri böhranları fonunda enerji təhlükəsizliyinin önəmini vurğulayıb. O, Türkiyənin enerji ehtiyacını ödəmək üçün enerji mənbələrinin şaxələndirilməsinin vacib olduğunu deyib.

Bayraktar qeyd edib ki, İran qazı hazırda da Türkiyə bazarına çatdırılır və bu tədarük ölkənin ümumi qaz tələbatını ödəməkdə mühüm rol oynayır.

“Bu il tələbatımız 60 milyard kubmetrə çata bilər. Bu, böyük rəqəmdir və əlavə həcmə ehtiyacımız var” – deyə o bildirib.

Nazir həmçinin, İsrail-İran qarşıdurmasının enerji bazarına təsirinə toxunaraq, regional gərginliklərin risklərini azaltmaq üçün çevik və dayanıqlı enerji strategiyalarının tətbiq olunduğunu qeyd edib.