Bakı, AzerVoice
İraq ordusu cümə axşamı ölkənin şimalındakı Kərkük şəhərində Türkiyəyə məxsus pilotsuz uçuş aparatını vurduğunu açıqlayıb.
AzerVoice xəbər verir ki, İraq rəsmiləri təyyarənin şimaldakı Kürd muxtariyyətinin ikinci şəhəri olan Süleymaniyyə istiqamətindən gəldiyini bildiriblər.
AFP-yə danışan və adının çəkilməsini istəməyən polis və ordu rəsmiləri dağıntıların şəhərin mərkəzindəki bir evə ziyan vurduğunu bildiriblər.
Birbaşa itkilər barədə məlumat verilməsə də, polis rəsmisi təyyarənin qəzaya uğramasından sonra yaxınlıqdakı tikinti sahəsində işləyən dülgərin xəstəxanaya yerləşdirildiyini bildirib.
Kərkük Hava Hücumundan Müdafiə Komandirinin müavini general Əbdüsselam Ramazan təyyarənin vurulduğu yerdə keçirdiyi mətbuat konfransında "İraq hava məkanına daxil olan türk pilotsuz uçuş aparatı vuruldu" deyib.
Ramazan bildirib ki, pilotsuz uçuş aparatı "şimaldakı Kürd muxtariyyətinin ikinci şəhəri olan Süleymaniyyə istiqamətindən gəlib".
Digər tərəfdən, vurulan pilotsuz uçuş aparatının Aksunqur tipli olduğu öyrənilib.
Etnik cəhətdən qarışıq struktura malik olan Kərkük və onun ətrafındakı neft yataqları muxtar bölgəyə daxil deyil və birbaşa Bağdaddakı federal hökumət tərəfindən idarə olunur.
Qeyd edək ki, Türkiyə PKK-ya qarşı ölkə hüdudlarından kənarda həyata keçirdiyi əməliyyatlar çərçivəsində son 25 ildə Şimali İraqda çoxsaylı hərbi bazalar yerləşdirib.
Onun əsgərləri mütəmadi olaraq PKK hədəflərinə qarşı əməliyyatlar aparır, lakin bu əməliyyatlarla bağlı açıqlamalar ancaq müəyyən dövrlərdə verilir.
Bağdad rəhbərliyi mart ayında səssiz-səmirsiz şəkildə PKK-nı “qadağan olunmuş təşkilat” kimi qeyri-qanuni elan etdi və bu ayın əvvəlində Ankara ilə birlikdə PKK-ya qarşı mübarizədə birgə təlim və komandanlıq mərkəzlərinin yaradılmasını nəzərdə tutan tarixi hərbi əməkdaşlıq müqaviləsi imzaladı.
Qeyd edək ki, 1984-cü ildən Türkiyə Respublikasına qarşı hücumlar həyata keçirən PKK Ankara və onun Qərb müttəfiqləri tərəfindən “terror təşkilatı” kimi qara siyahıya salınıb.
Lakin ABŞ PKK-nın Suriya qolu olan YPG qüvvələri ilə sözü gedən ölkədə birgə hərəkət edir.
