BAKI,VOA, Fərid Mikayılov

İraqın Baş naziri Əli Falih əz-Zeydi ölkədə silahların yalnız dövlət nəzarətində saxlanılmasını nəzərdə tutan qanun layihəsinin hazırlanması ilə bağlı göstəriş verib.

VOA xəbər verir ki, baş nazir bu barədə Parlamentin Təhlükəsizlik və Müdafiə Komissiyasının rəhbəri Xalid əl-Ubeydi ilə Bağdadda keçirilən görüş zamanı açıqlama verib.

Görüşdə İraqdakı təhlükəsizlik vəziyyəti, sabitliyin qorunması, dövlət sərhədlərinin və hava məkanının müxtəlif təhdidlərdən müdafiəsi istiqamətində görülən tədbirlər müzakirə olunub.

Əli Falih əz-Zeydi konstitusiya prosedurlarına uyğun olaraq silahların dövlət nəzarətində toplanması ilə bağlı qanun layihəsinin hazırlanmasına dair tapşırıq verib.

İraq Baş naziri bildirib ki, nəzarətsiz silahlar dövlət üçün ən ciddi təhlükələrdən biridir. Onun sözlərinə görə, bu vəziyyət hüququn aliliyini zəiflədir və təhlükəsizlik qurumlarının nüfuzuna mənfi təsir göstərir.

Zeydi ölkənin təhlükəsizliyinin, əhalinin rifahının və dövlət imkanlarının qorunması üçün siyasi, iqtisadi və təhlükəsizlik sabitliyinin gücləndirilməsinin vacibliyini vurğulayıb.

Baş nazir qanunların qəbulunda, hökumətin inkişaf proqramlarının hüquqi əsaslarının yaradılmasında və sabitliyin möhkəmləndirilməsində icra və qanunverici orqanlar arasında əməkdaşlığın artırılmasının əhəmiyyətini qeyd edib.

İraq Silahlı Qüvvələrinin Baş Komandanlığı daha əvvəl silahların dövlət nəzarətində toplanması məqsədilə xüsusi komitənin yaradıldığını açıqlamışdı. Hökumətin planına əsasən, bu prosesin sentyabr ayının sonunadək həyata keçirilməsi nəzərdə tutulur.

İraqda dövlət qurumlarından kənarda fəaliyyət göstərən silahlı qrupların mövcudluğu uzun illərdir ölkənin əsas təhlükəsizlik və siyasi problemlərindən biri hesab olunur. Hökumət silah üzərində vahid dövlət nəzarəti yaratmaqla daxili sabitliyi gücləndirməyə və regional gərginliklərin ölkəyə təsirini azaltmağa çalışır.