BAKI,VOA,Yusif Şərifzadə

İranın Xuzistan vilayətinin təhlükəsizlik məsələləri üzrə qubernator müavini Vəliullah Həyati bildirib ki, ABŞ son 10 gün ərzində ölkənin cənub-qərbində yerləşən Xuzistan vilayətində ən azı 95 nöqtəyə hava zərbələri endirib.

VOA xəbər verir ki, İranın "Tasnim" xəbər agentliyinin yaydığı məlumata görə, Həyati hücumların vilayətin 12 rayonunu əhatə etdiyini bildirib. O, bunu "düşmənin hədsiz cinayətkarlığının nümayişi" kimi qiymətləndirib.

İran rəsmisinin sözlərinə görə, zərbələr nəticəsində azı səkkiz mülki şəxs həlak olub. Yaralıların sayı və dağıntıların miqyası barədə isə ətraflı məlumat açıqlanmayıb.

Xuzistan İranın əsas neft və qaz ehtiyatlarının cəmləşdiyi strateji bölgələrdən biri hesab olunur. Vilayətdə ölkənin enerji infrastrukturu, neft emalı müəssisələri və mühüm sənaye obyektləri yerləşir.

ABŞ tərəfi İran rəsmisinin səsləndirdiyi bu iddialara hələlik rəsmi münasibət bildirməyib. Məlumat da müstəqil mənbələr tərəfindən təsdiqlənməyib.

Son günlər ABŞ və İran arasında qarşıdurmanın kəskinləşməsi fonunda hər iki tərəfdən itkilər və hücumlarla bağlı ziddiyyətli açıqlamalar verilir. Bu isə Yaxın Şərqdə təhlükəsizlik vəziyyəti ilə bağlı narahatlıqları daha da artırır.