BAKI,VOA, Fərid Mikayılov

İran Prezidenti Məsud Pezeşkian bildirib ki, ABŞ Pakistanın vasitəçiliyi ilə əldə olunmuş anlaşma memorandumunun şərtlərinə sadiq qalacağı təqdirdə, Tehran da üzərinə götürdüyü bütün öhdəlikləri yerinə yetirəcək.

VOA xəbər verir ki, prezident sosial şəbəkədəki paylaşımında qeyd edib ki, əldə olunan qarşılıqlı anlaşma yalnız birtərəfli deyil, iki tərəfin öhdəliklərinə əsaslanan prosesdir. Onun sözlərinə görə, İran Vaşinqtonun memorandumun müddəalarına əməl etməsinə uyğun şəkildə addımlar atacaq.

Məsud Pezeşkian vurğulayıb ki, Tehran qərarlarını bundan sonra da rasionallıq və insan ləyaqətinə hörmət prinsipləri əsasında qəbul edəcək. O əlavə edib ki, İran əsassız təhdidlərə və məntiqsiz bəyanatlara qətiyyətlə cavab verməyə davam edəcək.

Xatırladaq ki, İran və ABŞ iyunun 18-də Pakistanın vasitəçiliyi ilə İslamabad Anlaşma Memorandumunu imzalayıblar. Sənəd iki ölkə arasında gərginliyin azaldılması və daha geniş razılaşmaya dair danışıqların başlanması üçün hüquqi çərçivə müəyyən edir.