BAKI,VOA Orxan Qədirzadə

İran prezidenti Məsud Pezeşkian ölkənin ali rəhbərliyi ilə keçirdiyi son görüş və İranın qarşılaşdığı xarici təzyiqlərlə bağlı diqqətçəkən açıqlamalar verib.

VOA xəbər verir ki, Pezeşkian bildirib ki, o, yaxın zamanda Müctəba Xamenei ilə iki saat yarım davam edən görüş keçirib. Prezidentin sözlərinə görə, görüş qarşılıqlı etimad və birbaşa dialoq şəraitində baş tutub.

İran prezidenti vurğulayıb ki, ölkə iqtisadi təzyiqlər və xarici basqılarla üz-üzədir. Onun sözlərinə görə xarici qüvvələr iqtisadi təzyiqləri artırmağa çalışır, daxili sabitliyi pozmaq məqsədi güdür, milli həmrəyliyi zəiflətmək istəyir

Pezeşkian iddia edib ki, ABŞ rəsmiləri açıq şəkildə İran xalqına iqtisadi təzyiqin artırılmasından danışırlar və bunun əsas məqsədi cəmiyyətdə narazılıq formalaşdırmaqdır.

Prezident bildirib ki, xarici təzyiqlərin əsas məqsədi ictimai qəzəb yaratmaq, insanları küçə etirazlarına yönləndirmək, idarəetmə strukturunu zəiflətməkdir.

Onun sözlərinə görə, İran təhlükəsizlik və iqtisadi obyektlərinə qarşı həyata keçirilən hücumlar da ölkədə xaos yaratmaq məqsədi daşıyır.

Pezeşkian daxildə fikir ayrılıqlarının təbii olduğunu desə də, hazırkı mərhələdə əsas prioritetin daxili parçalanmanın qarşısını almaq olduğunu vurğulayıb.

O bildirib ki, bütün iranlılar ölkənin güclü olmasını istəyir, milli birlik və həmrəylik kritik əhəmiyyət daşıyır, mövcud mərhələnin aşılması üçün ictimai həmrəylik vacibdir.

İran rəhbərliyinin bu açıqlamaları regionda artan geosiyasi gərginlik, iqtisadi sanksiyalar və daxili sosial təzyiqlər fonunda verilir. Analitiklər hesab edir ki, Tehran rəhbərliyi hazırda həm daxili siyasi sabitliyi qorumağa, həm də xarici təzyiqlərə qarşı vahid mövqe nümayiş etdirməyə çalışır.