BAKI,VOA, Orxan Qədirzadə

ABŞ-da hərbi rəhbərlikdə gözlənilməz dəyişiklik regiondakı gərginlik fonunda diqqət çəkib.

VOA xəbər verir ki, Pentaqon ABŞ Hərbi Dəniz Qüvvələrinin naziri Con Felanın vəzifəsindən azad edildiyini açıqlayıb.

Rəsmi açıqlamada istefanın səbəbləri barədə məlumat verilməsə də, qərarın İranla dəniz qarşıdurmasının pik mərhələsinə təsadüf etməsi müxtəlif ehtimalları gündəmə gətirib.

Məlumata görə, Felan istefasından qısa müddət əvvəl çıxışlarında ABŞ donanmasının uzunmüddətli modernləşdirilməsi və “yüksək-aşağı qarışıq” strategiyası üzərində dayanıb. Lakin bu yanaşmanın hazırkı hərbi rəhbərliyin daha sərt və operativ hərəkət xətti ilə ziddiyyət təşkil etdiyi bildirilir.

Analitiklər qeyd edir ki, ABŞ Hərbi Dəniz Qüvvələrinin İran limanlarına qarşı həyata keçirdiyi blokada və son hərbi addımlar Vaşinqtonun daha aqressiv strategiyaya keçdiyini göstərir.

Qərardan sonra müdafiə nazirliyində vəzifəni müvəqqəti olaraq Honq Kao icra etməyə başlayıb. Onun hərbi əməliyyat təcrübəsinə malik olması Pentaqonun sahə yönümlü və daha sərt idarəetmə modelinə üstünlük verdiyini göstərir.

Ekspertlər hesab edir ki, bu dəyişikliklər təkcə şəxsi qərar deyil, ABŞ-ın ümumi hərbi strategiyasında transformasiyanın tərkib hissəsi ola bilər.

Bildirilib ki, son həftələrdə ABŞ ordusunda yüksək vəzifəli şəxslərin ardıcıl şəkildə dəyişdirilməsi daha geniş struktur yenidənqurmasının getdiyini göstərir.

Müşahidəçilər qeyd edir ki, bu addım regionda, xüsusilə Hörmüz boğazı ətrafında baş verən hadisələr fonunda yeni mərhələnin başlanğıcı kimi qiymətləndirilə bilər.