BAKI,VOA, Orxan Qədirzadə
ABŞ Dəniz Piyadaları qüvvələri “Blue Star 3” adlı ticarət gəmisinə çıxış əməliyyatı həyata keçirib. Əməliyyat 28 aprel tarixində səhər saatlarında icra olunub.
VOA xəbər verir ki, ABŞ Mərkəzi Komandanlığının (CENTCOM) məlumatına əsasən, gəmi İran limanlarına yönəlmək ehtimalı ilə şübhəli hesab edilib və ABŞ-ın tətbiq etdiyi dəniz blokadası çərçivəsində yoxlanılıb. Yoxlama başa çatdıqdan sonra gəminin İran limanlarına getmədiyi müəyyən olunub və buraxılıb.
Gəminin marşrutu diqqət çəkib
Məlumatlara görə, Komor adaları bayrağı altında üzən və IMO 9133147 qeydiyyat nömrəsinə malik gəmi aprelin əvvəlində İranın Şəhid Rəcai limanı yaxınlığından hərəkətə başlayıb. Daha sonra Hörmüz boğazını keçərək Pakistanın Kəraçi limanına çatıb.
Gəmi sonrakı günlərdə Qvadar istiqamətinə yönəlib və Pakistan sahilləri yaxınlığında bir neçə gün hərəkətsiz qalıb. 27 aprel tarixində isə istiqamətini dəyişərək yenidən Pakistan sahillərinə doğru manevr edib.
Dəniz izləmə sistemlərinin məlumatına əsasən, gəmi 28 aprel səhər saatlarında “Not Under Command” statusu elan edib. Bu status gəminin idarəetmədə məhdudiyyət yaşadığını göstərir və əməliyyatın vaxtı ilə üst-üstə düşməsi diqqət çəkir.
ABŞ hərbi mövcudluğu artır
Məlumata görə, əməliyyatda ABŞ Dəniz Piyadalarının 31-ci Ekspedisiya Bölməsi iştirak edib. Bu addım Vaşinqtonun İranla bağlı tətbiq etdiyi dəniz nəzarət tədbirlərinin tərkib hissəsi kimi qiymətləndirilir.
Eyni zamanda, peyk görüntüləri regionda ABŞ hərbi mövcudluğunun gücləndiyini göstərir. Ərəb dənizində ABŞ-a məxsus “Abraham Lincoln” təyyarədaşıyan gəmisi və müşayiət edən esmineslər müşahidə olunub. Bundan əlavə, “USS Tripoli” desant gəmisi də Oman sahilləri yaxınlığında qeydə alınıb.
39 gəmi istiqamətini dəyişib
ABŞ tərəfi bildirib ki, dəniz blokadası çərçivəsində indiyədək 39 gəminin marşrutu dəyişdirilib. Vaşinqton bu tədbirlərin yalnız İran limanları ilə əlaqəli gəmilərə yönəldiyini və beynəlxalq ticarətə maneə yaratmadığını vurğulayır.
Analitiklər qeyd edirlər ki, bu cür əməliyyatlar regionda hərbi-siyasi gərginliyi artırmaqla yanaşı, qlobal ticarət marşrutlarına da təsir göstərə bilər.