BAKI,VOA, Orxan Qədirzadə

ABŞ hərbi rəhbərliyi İran limanlarına qarşı tətbiq edilən dəniz blokadasının sərtləşdirildiyini və qlobal miqyasda genişləndirildiyini açıqlayıb.

VOA xəbər verir ki, ABŞ Baş Qərargah rəhbərliyi İran istiqamətində hərəkət edən və ya şübhəli hesab edilən bütün gəmilərin nəzarətdə saxlanıldığını bildirib. Qeyd olunub ki, blokada çərçivəsində istənilən gəmi, mənsubiyyətindən asılı olmayaraq yoxlanıla və saxlanıla bilər.

Rəsmi açıqlamada vurğulanıb ki, ABŞ qüvvələri İranın “kölgə donanması” adlandırılan gəmilərinə qarşı dənizdə qarşısınıalma əməliyyatlarını davam etdirəcək. Bildirilir ki, İran tərəfindən son dövrdə 5 ticarət gəmisinə hücum edildiyi iddia olunur.

ABŞ müdafiə rəhbərliyi əlavə edib ki, hərbi qüvvələr yüksək hazırlıq vəziyyətindədir və prezident Donald Tramp tərəfindən veriləcək əmr əsasında genişmiqyaslı əməliyyatların yenidən başlanmasına hazırdır.

Digər açıqlamada qeyd olunub ki, indiyədək Hörmüz boğazı istiqamətində hərəkət edən 34 gəminin marşrutu dəyişdirilib və ya geri qaytarılıb. ABŞ tərəfi İranın nüvə silahı əldə etməsinə imkan verilməyəcəyini vurğulayıb.

ABŞ rəsmiləri bildiriblər ki, dəniz blokadası qlobal xarakter alıb və lazım olduğu müddət ərzində davam etdiriləcək. Bununla yanaşı, İranın razılaşma əldə etməsi üçün “tarixi imkan”a sahib olduğu qeyd edilib.

Məlumatda həmçinin qeyd olunur ki, ABŞ hərbi qüvvələri tam döyüş hazırlığı vəziyyətindədir və növbəti mərhələyə keçid üçün bütün əməliyyat imkanları hazır saxlanılır.