BAKI,VOA
ABŞ-ın nüfuzlu "Washington Post" qəzeti Pakistanın yüksək rütbəli rəsmisinə istinadən xəbər verir ki, rəsmi İslamabad ABŞ Prezidenti Donald Trampa xüsusi mesajlar ünvanlayıb. Mesajlarda prezidentin İranla bağlı çıxışlarında istifadə etdiyi kəskin ritorika barədə xəbərdarlıq edilib.
Pakistanlı rəsminin bildirdiyinə görə, İslamabad Vaşinqtonla Tehran arasında davam edən gərginliyin diplomatik yollarla həlli üçün vasitəçilik səylərini davam etdirir. Bu çərçivədə Trampa çatdırılan mesajlarda onun açıq bəyanatlarında "sərt və güclü dildən" istifadə etməsinin danışıqlar prosesinə zərər verə biləcəyi vurğulanıb.
Qeyd edək ki, Pakistan hazırda Vaşinqton və Tehran arasında əsas rabitə kanallarından birini təmin edir. İslamabadın bu xəbərdarlığı Trampın son vaxtlar İranı "tamamilə məhv etmək" və "sarsıdıcı qələbə qazanmaq" barədə verdiyi bəyanatların regionda vəziyyəti daha da gərginləşdirməsindən duyulan narahatlığı əks etdirir.