BAKI,VOA, Fərid Mikayılov

Küveyt bayrağı altında üzən “Al-Salmi” neft tankeri Dubay sahilləri yaxınlığında İran tərəfindən hücuma məruz qalıb. Hadisə regionda son dövrlərdə artan raket və pilotsuz uçuş aparatları hücumlarının davamı kimi qiymətləndirilir.

VOA xəbər verir ki, səhər saatlarında baş verən hücum nəticəsində təxminən 2 milyon barel neft daşıyan tankerə zərbə dəyib və gəmidə yanğın baş verib.

Yanğının qısa müddətdə nəzarətə alındığı, həmçinin neft sızmasının qarşısının alındığı bildirilir.

Tankerin sahibi olan “Kuwait Petroleum” şirkəti hadisəni təsdiqləyərək bildirib ki, zərərin miqyası qiymətləndirilir.

Qeyd olunur ki, bu, son həftələrdə Fars körfəzində iri ticarət gəmilərinə qarşı həyata keçirilən hücumların növbəti halıdır. Mart ayının ortalarında Marşal adaları bayrağı altında üzən ABŞ-a məxsus tanker də oxşar hücuma məruz qalmışdı.

Eyni zamanda, bölgədə fəaliyyət göstərən bəzi beynəlxalq şirkətlərə məxsus konteyner gəmiləri təhlükəsizlik səbəbindən marşrutlarını dəyişmək məcburiyyətində qalıb.