BAKI, VOA, Orxan Qədirzadə

Yaxın Şərqdə dördüncü həftəsinə daxil olan hərbi münaqişə yeni və daha təhlükəli mərhələyə qədəm qoyub. ABŞ və İsrail hərbi hava qüvvələrinin İranın Nətənz nüvə obyektinə zərbələr endirdiyi, Tehranın isə buna cavab olaraq ilk dəfə region hüdudlarından kənara ballistik raketlər atdığı bildirilir.

VOA xəbər verir ki, İranın Nətənz uran zənginləşdirmə zavoduna edilən hücumdan sonra binalara ciddi ziyan dəysə də, Beynəlxalq Atom Enerjisi Agentliyi (BAEA) ərazidə radiasiya sızmasının qeydə alınmadığını bəyan edib. Agentlik nüvə qəzası riskindən qaçmaq üçün tərəfləri hərbi təmkin nümayiş etdirməyə çağırıb. Buna cavab olaraq İran ordusu Hind okeanının mərkəzində yerləşən ABŞ və Britaniyanın Dieqo-Qarsiya müştərək hərbi bazasına iki orta mənzilli ballistik raket atıb. Raketlərin hədəfə dəymədiyi bildirilsə də, bu hadisə İranın Yaxın Şərq hüdudlarını aşan raket imkanlarını nümayiş etdirməsi baxımından ilk hal kimi qiymətləndirilir.

ABŞ Prezidenti Donald Tramp hərbi əməliyyatların azaldıla biləcəyinə dair ziddiyyətli mesajlar versə də, bölgəyə əlavə döyüş gəmiləri və qoşun birləşmələri yeridilir. Tramp həmçinin İranın neft ixracı üçün həyati əhəmiyyət kəsb edən Xark adasını vurmaqla hədələyib. O, NATO müttəfiqlərini Hörmüz boğazının açılması üçün hərbi əməliyyatlara qoşulmadıqlarına görə "qorxaq" adlandırıb və alyansı "kağız pələng"ə bənzədib. Qeyd edək ki, dünya neft ticarətinin 20 faizinin keçdiyi Hörmüz boğazının bağlanması nəticəsində neftin qiyməti bir barel üçün 119 dolları ötüb.

Münaqişənin miqyası digər körfəz ölkələrinə də sıçrayıb. İranın pilotsuz uçuş aparatları Küveytin "Mina Əl-Əhmədi" neft emalı zavoduna və Qətərin "Ras Laffan" enerji kompleksinə zərbələr endirib. Hücumlar nəticəsində Qətərin mayeləşdirilmiş təbii qaz (LNG) ixracat potensialı 17 faiz azalıb. Eyni zamanda, İsrail Livanın paytaxtı Beyruta və Tehrana hava zərbələrini davam etdirir, İran isə dünyanın istənilən nöqtəsindəki turistik mərkəzlərin ABŞ və İsrail rəsmiləri üçün təhlükəsiz olmayacağı ilə hədələyir.