BAKI,VOA, Fərid Mikayılov

İranın endirdiyi zərbələr nəticəsində İsrailin mərkəzi hissəsində yerləşən Ramat Qan bölgəsində iki nəfər həlak olub, bir neçə nəfər yaralanıb.

VOA xəbər verir ki, hücum nəticəsində Tel-Əvivdə dəmir yolu stansiyası da daxil olmaqla mülki infrastruktura ciddi ziyan dəyib.

Məlumata görə, hücum zamanı çoxsaylı döyüş başlıqları daşıyan raketlərdən istifadə olunub ki, bu da hava hücumundan müdafiə sistemlərini aşmaq məqsədi daşıyıb. İsrail mediası partlayışlardan sonra qəlpələrin geniş əraziyə yayıldığını və ciddi dağıntılar törətdiyini bildirib.

İran İnqilab Keşikçiləri Korpusu açıqlamasında hücumun İsrail tərəfindən təhlükəsizlik rəsmisi Əli Laricaniyə qarşı həyata keçirilən sui-qəsdə cavab olaraq təşkil edildiyini bəyan edib.

Bildirilir ki, hücum nəticəsində həlak olan şəxslər 70 yaşlarında olan bir cütlük olub. Onların evində sığınacaq otağı olsa da, vaxtında ora çata bilmədikləri qeyd olunur. Bu hal İsraildə hava hücumu siqnallarının effektivliyi ilə bağlı narahatlıqları artırıb.

Çərşənbə günü səhər saatlarında İran tərəfindən İsrailin mərkəzinə doğru daha bir raket dalğasının atıldığı bildirilib.

Eyni zamanda, İran daxilində İsrailin “MOSSAD” kəşfiyyat xidməti ilə əməkdaşlıqda ittiham olunan bir şəxsin edam edildiyi açıqlanıb.

Bundan əlavə, Beynəlxalq Atom Enerjisi Agentliyi İranın Buşehr Atom Elektrik Stansiyasının ərazisinə mərmi düşdüyü barədə məlumat verdiyini, lakin obyektə zərər dəymədiyini və xəsarət alan olmadığını bildirib.

Qeyd edək ki, Əli Laricaniyə qarşı həyata keçirilən hücum münaqişənin başlanmasından bəri ən yüksək səviyyəli hədəflərdən biri hesab olunur. İsrailin hava zərbələri nəticəsində həmçinin “Bəsic” qüvvələrinin rəhbəri Qulamrza Süleymani də öldürülüb.