BAKI, AzerVoice

2024-cü ilin noyabrı ilə 2025-ci ilin yanvarı arasında 47 ölkədə 48 mindən çox iştirakçı ilə keçirilən sorğuya görə, respondentlərin üçdə ikisindən çoxu süni intellekt alətlərindən mütəmadi istifadə etdiyini bildirib. Lakin onların yalnız 46 faizi bu texnologiyalara etibar etdiyini deyib.

Tədqiqat iştirakçılarından süni intellektin texniki yetərliyi, təhlükəsizlik, etika və ədalətlilik prinsiplərinə riayət etməsi ilə bağlı etimadlarını 9 ballıq sistem üzrə qiymətləndirmələri istənilib. Nəticələr göstərib ki, istifadəçilər texniki dəqiqliyə nisbətən daha çox güvənirlər, lakin ədalət və zərər verməmə prinsipləri ilə bağlı ciddi şübhələr qalır.

Sorğu nəticələrinə əsasən, respondentlərin 58 faizi iş yerində süni intellektdən istifadə etdiklərini bildirib. Onlardan 33 faizi bu texnologiyanı ya hər gün, ya da hər həftə işlərinə tətbiq etdiklərini deyib.

Respondentlər süni intellektin işləri sürətləndirdiyini, məlumatlara çıxışı artırdığını və innovasiyaya töhfə verdiyini bildiriblər. Hətta iştirakçıların yarısı süni intellektin gəlir gətirən fəaliyyətləri artırdığını qeyd edib.

Lakin bu texnologiyalardan istifadə ilə bağlı risklər də mövcuddur. İstifadəçilərin yarısı süni intellekt çatbotlarından istifadə edərkən şirkət siyasətini pozduqlarını etiraf edib. Onların bəziləri şəxsi və korporativ məlumatları açıq platformalara yüklədiklərini, deepfake halları ilə qarşılaşdıqlarını bildirib.

Bundan əlavə, istifadəçilərin 57 faizi süni intellektlə hazırlanan materialları öz adlarına təqdim etdiklərini, 56 faizi isə nəticələri yoxlamadan istifadə etdiklərinə görə işlərində səhvlərə yol verdiklərini qeyd edib.

Araşdırma göstərib ki, işçilərin yarısı süni intellektin necə işlədiyini anlamır. Yalnız hər beş nəfərdən ikisi bu texnologiya ilə bağlı təlim keçdiyini bildirib.