BAKI, AzerVoice

Zəlzələdən qorxan uşaqlara necə dəstək olmaq olar?

Mütəxəssislər İstanbulda baş verən zəlzələdən sonra uşaqlarda yaranan narahatlığın gələcəkdə fobiyaya çevrilməməsi üçün valideyn və müəllimlərin düzgün yanaşmasının vacibliyini vurğulayırlar.

İnkişaf psixoloqu İrmak Kerimoğlunun sözlərinə görə, zəlzələ zamanı valideynlərin panikaya düşməsi normaldır, lakin bu ilkin reaksiyadan sonra uşaqlara təhlükəsiz bir mühitin yaradılması vacibdir. O bildirib ki, uşaqları zəlzələdən tam uzaqlaşdırmaq mümkün deyil, lakin onlara bu təbii hadisəni sadə və elmi şəkildə başa salmaq, qoruyucu tədbirlər haqqında danışmaq və zəlzələ anında nə edəcəklərini öyrətmək onların psixoloji dayanıqlığını gücləndirir.

Kerimoğlu valideynlərə xəbərdarlıq edib ki, “zəlzələ olmayacaq” kimi yalan təsəllilər əvəzinə real təhlükəsizlik tədbirlərini uşaqlarla bölüşmək daha faydalıdır. Şəhəri tərk edən ailələrin bu addımı uşaqlara “təhlükədən qaçış” kimi deyil, “dincəlmək üçün müvəqqəti dəyişiklik” kimi izah etmələri tövsiyə olunur. Əks halda, geri qayıdış daha ağır emosional təsir yarada bilər.

Qeyd edək ki, Bolu Abant İzzet Baysal Universitetinin professoru Zeynep Deniz Yöndem məktəblərdə pedaqoqların və müəllimlərin də bu dövrdə aktiv rol oynamalı olduğunu bildirir. Onun fikrincə, uşaqlara “qorxmaq və narahat olmaq normaldır” mesajını düzgün ünsiyyətlə vermək lazımdır. Zəlzələ yaşamış uşaqlar üçün məktəbə qayıtma prosesi mərhələli şəkildə həyata keçirilməlidir.