Bakı, AzerVoice

Yeni bir araşdırma göstərir ki, məktəblərdə telefon qadağası ilə şagirdlərin qiymətləri arasında birbaşa əlaqə yoxdur.

Smartfon istifadəsi məhdudlaşdırılan şagirdlərin psixi sağlamlığında, yuxu rejimində və sinif davranışlarında nəzərəçarpacaq dəyişiklik müşahidə edilməyib.

Bununla belə, ümumilikdə smartfon və sosial şəbəkələrdə uzun müddət vaxt keçirməyin uşaqların psixi sağlamlığına mənfi təsir etdiyi vurğulanır. Tədqiqat rəhbəri Dr. Goodyear, qadağaların kifayət etmədiyini, əlavə tədbirlərin görülməsinin vacib olduğunu bildirib.

Birmingem Universitetinin Lancet tibb jurnalında dərc edilən araşdırması 30 məktəbdə 1227 şagird arasında aparılıb. Nəticələr göstərir ki, məktəbdə smartfon istifadəsinin məhdudlaşdırılması gözlənilən psixi və akademik irəliləyişlərə səbəb olmur. Bununla belə, uzun müddət telefondan istifadə psixi sağlamlıq problemləri, yuxu pozğunluğu, aşağı akademik nəticələr və antisosial davranışlarla əlaqələndirilir.

BMT-nin təhsil agentliyi UNESCO, smartfonların tələbələrin diqqətini yayındırdığını, məxfilik problemləri və kiber zorakılıq riskləri yaratdığını bildirir. Hazırda dünyada hər dörd ölkədən biri məktəblərdə telefon istifadəsini məhdudlaşdırır.

Türkiyə və İngiltərədə də gənclərin sosial mediaya çıxışı ilə bağlı müzakirələr davam edir. Türkiyənin Nəqliyyat və İnfrastruktur Nazirliyi 16 yaşdan kiçik uşaqların sosial mediaya girişini məhdudlaşdırmağı planlaşdırır. İngiltərədə bəzi məktəblərdə isə şagirdlərə yalnız köhnə model "kərpic" telefonlardan istifadə etməyə icazə verilir.

Valideynlər və ekspertlər sosial media platformalarının uşaqlar üçün daha az asılılıq yaradan tənzimləmələr tətbiq etməli olduğunu irəli sürürlər. İngiltərədə aparılan bir araşdırmaya görə, 12-15 yaşlı uşaqların 96%-nin öz telefonu var.

Ümumilikdə araşdırmalar göstərir ki, məktəbdə smartfon istifadəsinə qadağa qoymaq təkbaşına yetərli həll yolu deyil və uşaqların texnologiyadan balanslı istifadə etməsi üçün əlavə tədbirlər görülməlidir.