Bakı, AzerVoice

Ürəkdə "mini beyin" adlanan müstəqil sinir sisteminin mövcudluğu ortaya çıxıb

AzerVoice xəbər verir ki, bu barədə İsveçin Karolinska İnstitutu və ABŞ-ın Kolumbiya Universiteti alimləri tərəfindən aparılan tədqiqat sonunda məlumat verilib.

Bu kəşf, ürəyin sadəcə beyinə bağlı avtonom sinir sistemi vasitəsilə idarə olunması ilə bağlı uzun illər davam edən nəzəriyyəni tamamilə dəyişdirir.

Araşdırma, ürək divarında mürəkkəb sinir şəbəkəsinin olduğunu və bu şəbəkənin ürəyin ritm tənzimlənməsində müstəqil rol oynadığını göstərib. Karolinska İnstitutundan Dr. Konstantinos Ampatzis, ürəyin bu "kiçik beyninin" beyin kimi ritmik funksiyaların idarə edilməsində əhəmiyyətli rol oynadığını bildirib. Neyron qruplarından biri ürəyin "təbii stimulyatoru" kimi işləyərək onun ritmini tənzimləyir.

Tədqiqat zebra balığı üzərində aparılıb və ürəkdəki neyronların quruluşu, funksiyası və təşkilini xəritələşdirmək üçün inkişaf etmiş texnologiyalardan, o cümlədən təkhüceyrəli RNT ardıcıllığı və elektrofizioloji üsullardan istifadə edilib. Bu sinir şəbəkəsi ilə beynin qarşılıqlı əlaqəsinin müxtəlif şərtlər, o cümlədən stress və xəstəliklər zamanı necə işlədiyi tədqiq edilir.

Ürək neyron şəbəkəsinin pozulmasının ürək xəstəliklərinə necə səbəb olduğunu araşdırmaqla, elm adamları yeni müalicə üsulları üçün potensial hədəflər müəyyən etməyi planlaşdırırlar. Bu kəşf, ürək xəstəlikləri üçün daha dəqiq diaqnoz və müalicə metodlarının hazırlanmasına ümid verir.