BAKI,AzerVoice
Ferents Puşkaş 2 aprel 1927-ci ildə Macarıstanın Budapeşt şəhərində anadan olub. Puşkaş futbola atasının məşqçisi olduğu Kispest komandasında başlayıb. O, 1943-1949-cu illərdə Kispeştdə 177 oyun keçirib və 187 qol vurub.
Gənc forvard 1949-cu ildə Budapeşt Honvedə transfer oldu. Altı il burada çıxış edən Puşkaş 164 matçda 165 qol vurub. Puşkaş oyun başına vurduğu orta qolla adını tarixə qızıl hərflərlə yazdı. Puşkaş vurduğu qəşəng qollarla qısa zamanda bütün dünyanın diqqətini çəkdi.
1945-ci ildə Macarıstan milli komandasında da oynamağa başladı və dəqiq sol ayaq zərbəsinin sahibi kimi tez bir zamanda ad qazandı.
“Sehrli Maqyarlar” kimi tanınan Macarıstan millisi 1950-1956-cı illər arasında 43 qələbə, 7 bərabərlik, 1 məğlubiyyətlə əla rekorda imza atdı və bu yolda 1952-ci il Helsinki Olimpiya Oyunlarında qızıl medal qazandı. Komandanın bu dövrdəki bir itkisi 1954-cü il Dünya Kubokunun finalında oldu. Hansı ki, Macarıstan Puşkaşın topuq zədəsi ilə oynamağa cəhd göstərməsi ilə Qərbi Almaniya 3-2 hesabı ilə məğlub oldu.
Puşkas 1958-ci ildə Real Madridə transfer olub. Orada Alfredo di Stefano ilə birlikdə dünyanın ən təhlükəli duetlərindən birini formalaşdırdı. Puşkaş ispan klubunda 262 oyunda 242 qol vurub və Real Madridin ardıcıl beş liqa çempionluğunda (1961-65) və üç avrokubok titulunda mühüm rol oynayıb.
1961-ci ildə İspaniya vətəndaşı olduqdan sonra Puşkaş 1962-ci il Dünya Kubokunda İspaniyanı təmsil etdi, lakin dörd matçda qol vura bilmədi. 1966-cı ildə karyerasını bitirdi və bir neçə il məşqçi kimi çalışdı.
1993-cü ildən sonra məşqçilik karyerasını başa vuran Puşkaş 2006-cı il noyabrın 17-də dünyasını dəyişib.
FİFA Puşkaş mükafatı
FİFA Puşkaş mükafatı — 2009-cu il 20 oktyabr tarixində FİFA tərəfindən yaradılmışdır. Təşkilatın keçmiş prezidenti Yozef Blatterin göstərişi ilə təsis edilmişdir.
"Futbol tarixində öz oyunu ilə iz buraxan birinin adını qorumaq olduqca önəmlidir. Ferents Puşkaş yalnız bir çox mükafat qazanmış futbolçu kimi deyil həmçinin möhtəşəm insan kimi ad qazanmışdır. Bu səbəbdən FİFA bu mükafatı onun adına təsis etməklə böyük sevinc hissi duyur",- bu fikirləri Blatter səsləndirmişdir.
Mükafatın ilk təqdimatı 2008/2009 mövsümünün sonunda olmuşdur. Mükafat ilk dəfə 2009-cu il dünyanın ən yaxşı oyunçusu mükafatı üzrə İsveçrədə baş tutmuş qala gecəsində təqdim edildi.
Qalib 21 dekabr tarixində elan edildi və mükafatın ilk sahibi portuqaliyalı Kriştiano Ronaldo olmuşdur.