İsmayıl Qarayev 1983-cü il martın 15-də Quba şəhərində həkim ailəsində anadan olub. O, ilk təhsilinə 1989-cu ildə Quba şəhər 3 saylı orta məktəbdə başlayıb. 2000-ci ildə Quba Özəl Türk Liseyindən məzun olan İsmayıl Qarayev həmin il Azərbaycan Tibb Universitetinə (ATU) daxil olub.

Təhsili və ixtisaslaşma dövrü

İsmayıl Qarayev 2006-cı ildə universiteti fərqlənmə diplomu ilə bitirmişdir. Ali təhsilini tamamladıqdan sonra onun tibbi fəaliyyəti və ixtisaslaşma yolu aşağıdakı mərhələlərlə davam edib:

2006–2007: Təcili Tibbi Yardım Xəstəxanasında təcrübə keçib.
2007–2009: Ukraynanın paytaxtı Kiyev şəhərində Davamlı Təhsil Tipli Akademiyada neyrocərrahiyyə üzrə kliniki ordinatura keçib.

Elmi və pedaqoji fəaliyyəti

İsmayıl Qarayev 2009-cu ildən etibarən ATU-nun neyrocərrahiyyə kafedrasında çalışır. 2018-ci ildən kafedranın assistenti vəzifəsini icra edir. Elmi fəaliyyətini uğurla davam etdirən mütəxəssis 2021-ci ildə Tibb üzrə fəlsəfə doktoru elmi dərəcəsi almaq üçün dissertasiya işini müdafiə etmişdir.

Onun elmi işinin mövzusu “Onurğanın boyun nahiyəsi sinir elementlərinin diskogen kompressiyasının klinika diaqnostika və cərrahi müalicəsi” olmuşdur. Hazırda o, 20-dən artıq elmi məqalənin və bir kitabın müəllifidir.

Beynəlxalq təcrübəsi və konfranslar

Neyrocərrah İsmayıl Qarayev peşəkar fəaliyyəti dövründə bir çox xarici ölkələrdə ixtisasartırma kurslarında və əməkdaşlıq proqramlarında iştirak edib:

2010: Almaniyanın Berlin şəhərində neyrocərrahiyyə üzrə təcrübə.
2013: Türkiyənin İzmir şəhərində “Spinal neyroşirurji ileri” proqramı üzrə təcrübə.

Bundan əlavə; Misir, Almaniya, Ukrayna, Kolumbiya və Türkiyə kimi ölkələrdə keçirilən neyrocərrahiyyə üzrə beynəlxalq elmi konfranslarda dəfələrlə iştirak edərək Azərbaycan tibb elmini təmsil etmişdir.

Şəxsi həyatı

İsmayıl Qarayev ailəlidir, iki övladı var.