BAKI,AzerVoice Analitik Təhlil Mərkəzi
Səudiyyə Ərəbistanının və Qətərin strateji əməkdaşlığı Riyadda keçirilən yüksək səviyyəli görüşlərlə yeni dinamika qazanır. Qətər Əmiri Şeyx Təmim bin Həməd Al Tani səfər çərçivəsində Səudiyyə Ərəbistanının Vəliəhd Şahzadəsi və Baş naziri Məhəmməd bin Salmanın rəsmi qarşılanması ilə Riyada çatıb. Görüş iki ölkə arasında bu gün keçiriləcək Qətər–Səudiyyə Ərəbistanı Koordinasiya Şurasının 8-ci iclasına birgə sədrlik məqsədi daşıyır.
Səfər öncəsi günlərdə hər iki tərəfin yüksək səviyyəli nümayəndə heyətləri arasında intensiv hazırlıq müzakirələri aparılıb. Ən önəmli görüşlərdən biri Riyadda Səudiyyə Ərəbistanının xarici işlər naziri Fəysal bin Fərhan ilə Qətərin Baş naziri və xarici işlər naziri Məhəmməd bin Əbdürrəhman Al Taninin görüşü olub. Tərəflər ikitərəfli münasibətlərin inkişafı, iqtisadi, investisiya və təhlükəsizlik sahələrində koordinasiya və əməkdaşlığın genişləndirilməsi məsələlərini müzakirə ediblər.
Nazirlər həmçinin Koordinasiya Şurasının iclasına hazırlıq çərçivəsində icra komitəsinin birgə iclasına sədrlik ediblər. Görüş zamanı qurumun komitə və işçi qruplarının son dövrdə həyata keçirdikləri layihələr, qarşıdakı dövr üçün nəzərdə tutulan təşəbbüslər və çoxtərəfli əməkdaşlıq formatları nəzərdən keçirilib. Hər iki tərəf aparılan işlərdən məmnunluğunu bildirərək, iki ölkə liderlərinin strateji vizyonuna uyğun genişlənən siyasi-iqtisadi koordinasiyanın əhəmiyyətini vurğulayıb.
İclasın sonunda Səudiyyə Ərəbistanının xarici işlər naziri ilə Qətər tərəfinin rəhbəri birgə protokolu imzalayıblar. Tədbirdə Səudiyyə tərəfdən Dövlət naziri Müsəid əl-Əyban, maliyyə naziri Məhəmməd əl-Cədan, siyasi işlər üzrə nazir müavini Səud əs-Sati və digər yüksək vəzifəli şəxslər iştirak ediblər.
Qətər Əmirini müşayiət edən nümayəndə heyətinə Baş nazir və xarici işlər naziri Məhəmməd bin Əbdürrəhman Al Tani ilə yanaşı, bir sıra nazirlik və qurumların rəhbərləri daxildir.
Analitiklərin fikrincə, Riyaddakı bu görüş Körfəz regionunda siyasi əlaqələrin ən yüksək sinxronlaşdırıldığı mərhələlərdən biri kimi qiymətləndirilir və Səudiyyə–Qətər münasibətlərinin strateji dərinləşməsində yeni səhifə açır.