BAKI,VOA Orxan Qədirzadə
NATO sammiti çərçivəsində Ankaraya gələn rəsmi dövlət başçılarının avtomobil karvanlarından bəzilərinin yanacaq doldurmaq üçün Petrol Ofisi məntəqəsinə daxil olması şirkətin hazırladığı reklam çarxı ilə sosial şəbəkələrdə geniş müzakirələrə səbəb olub. Qısa müddətdə yayılan video ictimaiyyət arasında fərqli reaksiyalar doğurub.
Petrol Ofisi paylaşdığı videoda sammit üçün Türkiyəyə gələn rəsmi avtomobillərin yanacaq doldurmasını nümayiş etdirərək "Etibar təsadüf deyil" mesajını ön plana çıxarıb. Şirkət bununla beynəlxalq səviyyəli tədbirdə seçilən yanacaq təminatçısı olmasını reklam kampaniyasının əsas mövzusu kimi təqdim edib.
Video yayımlandıqdan sonra sosial media istifadəçilərinin rəyləri əsasən üç istiqamətdə formalaşıb.
Birinci qrup istifadəçilər reklamın texniki keyfiyyətini tənqid edərək çəkilişlərin peşəkar səviyyədə olmadığını, görüntülərin adi mobil telefon vasitəsilə çəkilmiş təsiri bağışladığını və belə böyük şirkət üçün daha keyfiyyətli reklam hazırlanmasının gözlənildiyini bildiriblər.
İkinci qrup isə reklamın məntiqini sual altına alıb. Onların fikrincə, NATO sammiti kimi beynəlxalq tədbirlər zamanı yanacaq təminatı əvvəlcədən dövlət səviyyəsində bağlanmış müqavilələr əsasında həyata keçirilir. Buna görə də həmin görüntülərin reklam məqsədilə istifadə olunmasının xüsusi marketinq uğuru kimi təqdim edilməsinin doğru olmadığı irəli sürülüb.
Üçüncü qrup isə reklamı uğurlu marketinq nümunəsi kimi qiymətləndirib. Bu mövqeni müdafiə edənlər hesab edirlər ki, söhbət klassik reklam çarxından deyil, "real vaxt marketinqi" yanaşmasından gedir.
Marketinq baxımından real vaxt marketinqinin əsas xüsusiyyətləri hadisəyə operativ reaksiya vermək və mövcud gündəmlə əlaqəli yaradıcı mesaj hazırlamaq hesab olunur. Bu yanaşmada sürət və hadisəyə ağıllı istinad istehsal keyfiyyətindən daha vacib amillər sayılır.
Mütəxəssislərin fikrincə, belə reklam formatlarında uzunmüddətli planlaşdırma, yüksək büdcəli çəkiliş və mürəkkəb montaj əsas məqsəd deyil. Əsas hədəf gündəmdə olan hadisədən vaxtında istifadə etməklə auditoriyanın diqqətini cəlb etməkdir.
Bu səbəbdən reklam çarxının qısa olması və yüksək prodakşn keyfiyyətinə malik olmaması real vaxt marketinqinin prinsipləri baxımından normal qiymətləndirilir. Belə kampaniyalarda əsas üstünlük hadisəyə mümkün qədər sürətli reaksiya vermək və aktual mövzunu yaradıcı formada brend mesajına çevirmək hesab edilir.