BAKI, AzerVoice

“Türkiyə rəqəmsal təhlükəsizlikdə dünya standartlarını müəyyən edir”

AzerVoice xəbər verir ki, Türkiyənin Nəqliyyat və İnfrastruktur Naziri Abdulkadir Uraloğlu, Metanın 16 yaşdan kiçik istifadəçilərə valideyn icazəsi olmadan Instagram-da canlı yayıma icazə verməməsi qərarını müsbət dəyərləndirib.

Nazir bildirib ki, bu qərar Türkiyənin rəqəmsal təhlükəsizlik sahəsində atdığı addımların beynəlxalq platformalar tərəfindən dəstəkləndiyini göstərir.

Uraloğlu sosial media paylaşımında qeyd edib ki, AK Partiya hökumətləri uşaq və gənclərin onlayn təhlükəsizliyini hər zaman prioritet hesab edib. O, “sosial media yaş məhdudiyyəti layihəsi” ilə paralel şəkildə Metanın qərarının bu yöndə irəliləyiş olduğunu vurğulayıb.

Nazirin sözlərinə görə, valideyn razılığı olmadan canlı yayımın qadağan edilməsi və şübhəli şəkillərin avtomatik bulanması kimi tədbirlər onlayn risklərin qarşısını almaq baxımından əhəmiyyətlidir.

“Türk Əsri baxışı ilə uşaqlarımızın rəqəmsal sahədə güclü, azad və təhlükəsiz yaşaması üçün bütün imkanlarımızı səfərbər edirik. Bu sahədəki qətiyyətimiz sayəsində yalnız Türkiyədə deyil, dünyada da standartları müəyyən edən ölkə oluruq” - deyə o əlavə edib:

Qeyd edək ki, Meta 16 yaşdan kiçik istifadəçilərin valideyn icazəsi olmadan Instagram-da canlı yayıma qoşula bilməyəcəyini və şəxsi mesajlarda “bulanıqlaşdırma” funksiyasını deaktiv edə bilməyəcəyini açıqlayıb. Yeni qaydalar yaxın aylarda ABŞ, Böyük Britaniya, Kanada və Avstraliyada sınaqdan keçiriləcək və “Facebook” ilə “Messenger” platformalarına da şamil olunacaq.