BAKI,VOA Orxan Qədirzadə

Türkiyə Xarici İşlər Nazirliyi İsrail tərəfindən Yunanıstan sahilləri yaxınlığında saxlanılan Beynəlxalq Azadlıq donanmasına qatılan 59 nəfərin, o cümlədən 20 Türkiyə vətəndaşının yaxın saatlarda İstanbula gətiriləcəyini açıqlayıb.

VOA xəbər verir ki, nazirliyin məlumatına görə, Qəzzaya yardım çatdırmaq və blokadanı yarmaq məqsədilə yola çıxan donanmaya İsrail tərəfindən beynəlxalq sularda müdaxilə edilib. Hadisə nəticəsində 31 fəalın yaralandığı bildirilir.

Donanma nümayəndələrinin yaydığı məlumatda qeyd olunur ki, yaralılar arasında Yeni Zelandiya, Avstraliya, İtaliya, ABŞ, Kanada, Niderland, İspaniya, Böyük Britaniya, Kolumbiya, Almaniya, Macarıstan, Ukrayna, Fransa, Polşa və Portuqaliyadan olan şəxslər də var.

Digər açıqlamada isə saxlanılan fəalların İsrail donanmasına məxsus gəmidə təxminən 40 saat ərzində pis rəftara məruz qaldığı iddia olunub.

Məlumata əsasən, Beynəlxalq Azadlıq donanması 2026-cı ilin aprel ayında İspaniyanın Barselona şəhərindən yola düşüb, daha sonra İtaliyanın Siciliya adasından qoşulan iştirakçılarla birlikdə 39 ölkədən 345 nəfərin iştirakı ilə missiyasını davam etdirib.

İsrail hərbi qüvvələri aprelin 29-da gecə saatlarında Girit adası yaxınlığında beynəlxalq sularda flotiliyaya müdaxilə edərək 175 nəfəri saxlayıb. Daha sonra iştirakçıların böyük hissəsi mayın 1-də Yunanıstanın Girit adasında sərbəst buraxılıb.

Hazırda filonun bir hissəsi geri dönsə də, bəzi gəmilərin Yunanıstan sularında gözlədiyi və missiyanın davam etdirilməsi planlaşdırıldığı bildirilir.