BAKI,VOA, Fərid Mikayılov

Ömər Çelik bildirib ki, Türkiyənin pilotsuz uçuş aparatları və süni intellekt sahəsində imkanlarını inkişaf etdirməsi dövlətin təhlükəsizliyi və gələcəyi baxımından zəruridir.

VOA xəbər verir ki, Çelik sosial şəbəkə hesabında paylaşım edərək müdafiə sənayesində yerli və milli texnologiyaların strateji əhəmiyyətini vurğulayıb və Baykar şirkətinin uğurla tamamladığı son sınaqları təbrik edib.

Çelik bildirib ki, dünyanın hazırda keçdiyi mürəkkəb dövrdə və beynəlxalq qurumların təsirinin zəiflədiyi bir zamanda Türkiyənin öz imkan və qabiliyyətlərini artırması həyati əhəmiyyət daşıyır.

Baykar tərəfindən yerli imkanlarla hazırlanmış 5 ədəd K2 kamikadze pilotsuz uçuş aparatı müxtəlif düzülüşlərdə həyata keçirilən formasiya uçuşu sınaqlarını uğurla başa vurub.

Qabaqcıl süni intellekt alqoritmləri və sürü texnologiyası ilə təchiz edilən K2 kamikadze PUA-larının müasir döyüş meydanında Türkiyənin çəkindiricilik gücünü daha da artırması hədəflənir.

Çelik paylaşımının sonunda bu uğura imza atan Baykar komandası üzvlərini təbrik edib.