BAKI,AzerVoice, Fərid Mikayılov

Maliyyə Cinayətlərini Araşdırma İdarəsi (MASAK) Əkrəm İmamoğlunun oğlu Səlim İmamoğlunun Xorvatiyada təsis etdiyi Tectum Investment D.O.O. şirkətindəki maliyyə əməliyyatlarını araşdırıb və ciddi uyğunsuzluqlar aşkar edib.

AzerVoice xəbər verir ki, MASAK-ın 4 may 2025-ci il tarixli hesabatına görə, Səlim İmamoğlu 2023–2025-ci illər arasında şirkətə 7 ayrı transferlə ümumilikdə 388 min 63 avro göndərib.

İlk transfer 30 mart 2023-cü ildə 109 min 955 avro, digər transferlər isə 3 avqust 2023, 14 avqust 2023, 20 oktyabr 2023, 22 noyabr 2023, 13 fevral 2024 və 30 may 2024 tarixlərində həyata keçirilib. Bank qeydlərinə əsasən, göndərilən vəsaitlərin Səlim İmamoğlu tərəfindən həyata keçirildiyi təsdiqlənib.

Lakin MASAK, şirkətin 11 iyul 2024-cü ildə Voditse bölgəsində 1 milyon avro dəyərində 9 min 087 m²-lik sahə alması və həmin ərazidə 35 milyon avroluq lüks mənzil layihəsinə başlaması ilə göndərilən məbləğ arasında ciddi uyğunsuzluq olduğunu göstərib.

MASAK hesabatında bildirilir ki, 388 min 63 avroluq transferlə şirkətin 1 milyon avroluq sahə alması və 35 milyon avroluq layihəyə başlaması arasında maliyyə uyğunsuzluğu mövcuddur. Bu səbəbdən şirkətin maliyyə əməliyyatları diqqətlə izlənir və layihəyə milyonların qeyri-rəsmi şəkildə daxil olduğu ehtimal olunur.