BAKI, AzerVoice, Səməd Əyyubov

İstanbul Böyükşəhər Bələdiyyəsinin sədri vəzifəsindən uzaqlaşdırılaraq həbs edilən Əkrəm İmamoğlunun bakalavr diplomunun saxta olması iddiası ilə barəsində açılmış cinayət işinin ilk iclasında ara qərar elan edilib.

AzerVoice xəbər verir ki, iddianamədə İmamoğlunun “rəsmi sənəddə saxtakarlıq” maddəsi ilə zəncirvari şəkildə 2 il 6 aydan 8 il 9 aya qədər azadlıqdan məhrum edilməsi tələb olunurdu. Bu gün İstanbul 59-cu Ağır Cinayət Məhkəməsi tərəfindən Marmara Cəzaçəkmə Kompleksində keçirilən iclasda İmamoğlu və vəkilləri müdafiə çıxışı ediblər.

Hakim fasilədən sonra açıqladığı ara qərarda, diplomu ləğv edilən İmamoğlunun İstanbul 5-ci İdarə Məhkəməsinə təqdim etdiyi iddia dosyasının istənilməsinə qərar verib. İşdəki çatışmazlıqların aradan qaldırılması üçün məhkəmə prosesi 20 oktyabr 2025-ci ilədək təxirə salınıb.

Xatırladaq ki, Əkrəm İmamoğlu, 2025-ci il martın 23-də vəzifəsindən uzaqlaşdırılıb və “cinayətkar təşkilata rəhbərlik etmək”, “rüşvət alma” və “tender saxtakarlığı” ittihamları ilə həbs edilib.