BAKI, AzerVoice
Bursada baş verən ardıcıl zəlzələlər İstanbul və ətraf vilayətlərdə də hiss olunub.
AzerVoice xəbər verir ki, Türkiyənin
Bursa vilayətində bu gün ard-arda iki zəlzələ qeydə alınıb. AFAD-ın
verdiyi məlumata görə, yerli vaxtla saat 11:47-də episentri
Gəmlikdə olan 3,9 bal gücündə ilk zəlzələ baş verib.
Saat 12:57-də isə eyni bölgədə 4,2 bal gücündə ikinci zəlzələ qeydə
alınıb.
Zəlzələlər İstanbul, Yalova və digər ətraf bölgələrdə də hiss olunub. Təbii fəlakətin 9-10 kilometr dərinlikdə baş verdiyi açıqlanıb.
Daxili işlər naziri Ali Yerlikaya bildirib ki, “AFAD və digər aidiyyatı qurumlar sahə araşdırmalarına başlayıb, hazırda heç bir mənfi vəziyyət qeydə alınmayıb”.
CNN TÜRK-ə danışan geoloq Prof. Dr. Süleyman Pampal bölgənin Şimali Anadolu fay xəttinin cənub qolunda yerləşdiyini, bu səbəbdən baş verən zəlzələlərin seysmik baxımdan əhəmiyyətli olduğunu vurğulayıb.
Qeyd edək ki, zəlzələ bölgəsində hazırda vəziyyət nəzarət altındadır və müvafiq qurumlar monitorinqi davam etdirir.