BAKI, AzerVoice
“Yanğınsöndürmədə PUA-ların istifadəsində Avropada birinci, dünyada ikinciyik.”
AzerVoice xəbər verir ki, Türkiyə Prezidenti Rəcəb Tayyib Ərdoğan Etimesqut Hava Limanında keçirilən “Yaşıl Vətən Qəhrəmanları Növbətçi” proqramında çıxış edərək, meşə yanğınlarına qarşı mübarizə və ekoloji tədbirlər sahəsində ölkənin gördüyü işlər barədə danışıb.
Ərdoğan bildirib ki, Türkiyə meşə ərazilərinin qorunması və genişləndirilməsi istiqamətində böyük uğurlar əldə edib. “Son 23 ildə meşə fondumuzu 23,4 milyon hektara çatdırdıq. Ölkə ərazisinin 30 faizini meşələrlə əhatə etmişik. 2025-ci ilin sonunadək yanğın nəticəsində zərər görmüş ərazilər mütləq bərpa olunacaq” - deyə o qeyd edib.
Prezident çıxışında yanğınla mübarizədə texnologiyanın əhəmiyyətini də vurğulayıb. “Yanğınsöndürmədə pilotsuz uçuş aparatlarından istifadəyə görə Avropada birinci, dünyada ikinciyik. Hazırda 105 helikopter və PUA vasitəsilə operativ müdaxilə təmin edirik” - deyə o bildirib.
Ərdoğan həmçinin qeyd edib ki, meşə yanğınlarının qarşısının alınmasında 130 mindən çox könüllü iştirak edir və ölkə bu sahədə texniki imkanlarını davamlı şəkildə artırır.
“Zəlzələ və yanğın kimi həyati əhəmiyyətli məsələlərə daha çox vəsait ayrılmalıdır. Reklam, konsert və digər tədbirlərə ayrılan xərclərin bu kimi kritik sahələri üstələməsi yolverilməzdir. Büdcə vəsaitləri xalqın xeyrinə və səmərəli şəkildə istifadə edilməlidir”- deyə bələdiyyələrin büdcə prioritetlərinə də toxunan dövlət başçısı əlavə edib.
Qeyd edək ki, Türkiyədə 2024-cü il son 145 ilin ən isti ili kimi qeydə alınıb və 2025-ci ilin daha da isti keçəcəyi proqnozlaşdırılır.