BAKI, AzerVoice

19 May Atatürkü Anma, Gənclik və İdman Bayramı Türkiyənin bütün bölgələrində böyük coşqu ilə qeyd olunur.

AzerVoice xəbər verir ki, bayram münasibətilə dövlət rəsmiləri, gənclər və ictimaiyyət nümayəndələrinin iştirakı ilə müxtəlif tədbirlər keçirilib.

Ankarada təşkil olunan rəsmi mərasimdə Gənclik və İdman naziri Osman Aşkın Bak, 81 əyalətdən gələn gənc nümayəndələr, milli idmançılar və müşayiətçi heyətlə birlikdə Anıtkabirə ziyarət edib.

Nazir Atatürkün məzarı önünə əklil qoyub, daha sonra İstiqlal Marşı səsləndirilib və bir dəqiqəlik sükutla Ulu Öndər yad edilib.

“106 il əvvəl Samsunda yandırılan İstiqlal məşəli bu gün Türkiyədə birlik, əmin-amanlıq və ümid şəklində yaşayır. Gənclərimiz elm, sənət, idman və texnologiya sahələrində ölkəmizi daha da irəli aparmaq əzmindədir. Türkiyənin gücü onun gəncliyidir və bu güc ‘Türkiyə Əsri’ vizyonunun daşıyıcısıdır. Əmanətiniz etibarlı əllərdədir”- deyə Nazir Osman Aşkın Bak, Misak-ı Milli Qülləsində Anıtkabir Xüsusi Qeyd Defterini imzalayaraq yazıb.

Bayram çərçivəsində İstanbulun Taksim Cümhuriyyət Abidəsi önündə də anım mərasimi təşkil olunub.

Abidə önünə əklil qoyulub və İstiqlal Marşının səsləndirilməsi ilə tədbir davam edib. Ardınca siyasi partiyaların və vətəndaş cəmiyyətlərinin nümayəndələri də abidəyə əklil təqdim ediblər.

19 May bayramı münasibətilə ölkə üzrə məktəblərdə, meydanlarda və idman komplekslərində tədbirlər davam edir. Bayram gününün gəncliyə həsr olunması, Türkiyə Cümhuriyyətinin banisi Mustafa Kamal Atatürkün gənclərə verdiyi önəmi bir daha ortaya qoyur.