Bakı, AzerVoice

Türkiyə Xarici İşlər Nazirliyi İsrailin Milli Təhlükəsizlik naziri İtamar Ben-Qvirin Məscidül-Əqsa ilə bağlı açıqlamalarına sərt reaksiya verib.

AzerVoice xəbər verir ki, nazirlik açıqlamasında bildirib ki, “İsrailin müqəddəs yerlərin statusunu dəyişdirmək cəhdləri son dərəcə təhlükəlidir” .

Nazirlikdən o da bildirilib ki, bu bəyanatlar, həmçinin müqəddəs məkan olan Məscidül-Əqsanı hədəf alan təxribatlar müsəlmanların gərginliyinə və hiddətinə səbəb olur.

“İsrail hökumətinin Fələstin xalqına qarşı davam edən hücumları regional və qlobal sabitliyə hər gün daha çox təhlükə yaradır. Beynəlxalq ictimaiyyətin İsrail təcavüzünü dayandırmaq və Fələstin xalqını müdafiə etmək üçün hərəkətə keçməsinin vaxtı çatıb”-deyə nazirlikdən edilən açıqlamada bildirilib.

Xatırladaq ki, İsrail Ordusu Radiosuna müsahibə verən Ben-Qvir, mövcud siyasətin Məscidül-Əqsada “yəhudilərə ibadət etmələrinə icazə verdiyini” iddia etmişdi. Həmçinin o müsahibə zamanı "Əl-Əqsa məscidində sinaqoq tikərdinizmi?" sualına “bəli” deyə cavab vermişdi.

Qeyd edək ki, Ben-Qvirin müsahibəsindən sonra yazılı açıqlama verən İsrail Baş Nazirliyinin Mətbuat İdarəsi Məscidül-Əqsadakı status-kvonun dəyişmədiyini bildirib.

Ben-Qvirin açıqlamalarına ölkə liderlərindən və beynəlxalq təşkilatlardan reaksiyalar gəlməkdə davam edir.