BAKI,AzerVoice

Ramazan bayramı günlərində Türkiyənin müxtəlif şəhərlərindən gələn minlərlə insan "tarixin sıfır nöqtəsi" kimi tanınan Göbeklitepəni ziyarət edib.

AzerVoice xəbər verir ki, 12 min illik tarixi ilə bəşəriyyətin ən qədim məbədlərindən biri hesab edilən Göbeklitepe bayram günlərində 30 min turist qəbul edib.

9 günlük tətil müddətinin sonuna qədər bu sayın daha da artacağı gözlənilir.

Ziyarətçi sıxlığı səbəbindən bölgəyə gələn qonaqlar nəqliyyat vasitələrini təxminən 2 kilometr aralıda yerləşən dayanacaqda saxlayaraq, əraziyə pulsuz avtobuslarla daşınıblar. Biletlərini alan yerli və xarici turistlər daha sonra 12 min illik tarixə şahidlik etmək üçün arxeoloji əraziyə daxil olublar.

Şanlıurfa İl Mədəniyyət və Turizm Müdiri Aydın Aslan, 2019-cu ildə Prezident Rəcəb Tayyib Ərdoğan tərəfindən "Göbeklitepe ili" elan edilməsindən sonra bölgəyə marağın durmadan artdığını bildirib. O, xüsusilə Taştepelər layihəsi çərçivəsində aparılan yeni arxeoloji qazıntıların bu marağı daha da artırdığını vurğulayıb.

Şanlıurfanın Neolit dövründən etibarən mühüm bir mədəniyyət mərkəzi olduğunu qeyd edən Aslan, şəhərin tarixi, dini turizm və qastronomiya kimi müxtəlif turizm sahələrində geniş imkanlara sahib olduğunu vurğulayıb. O, 2025-ci ildə ziyarətçi sayının daha da artacağını, 2026-2027-ci illərdə isə bu rəqəmin 1,5-2 milyona yaxınlaşacağını proqnozlaşdırıb.

Qeyd edək ki, Göbeklitepe 2018-ci ildə YUNESKO-nun Dünya İrs Siyahısına daxil edilib və bəşəriyyətin ən qədim məbədlər kompleksi kimi tanınır. Bu tarixi ərazi həm yerli, həm də xarici turistlərin böyük marağına səbəb olur.