Bakı, AzerVoice

İndoneziya Prezidenti Prabowo Subianto Türkiyə ilə strateji tərəfdaşlığı gücləndirməkdə qətiyyətli olduqlarını bildirib.

AzerVoice xəbər verir ki, Prezident Rəcəb Tayyib Ərdoğanla görüşündən sonra keçirilən mətbuat konfransında Subianto iki ölkə arasındakı tarixi əlaqələrə diqqət çəkib və Osmanlı dövründən bəri Türkiyə ilə İndoneziyanın möhkəm bağlara sahib olduğunu vurğulayıb.

Subianto səfərin diplomatik münasibətlərin 75-ci ildönümünə təsadüf etdiyini qeyd edərək, Türkiyə nümayəndə heyətinə təşəkkür edib. O, Yüksək Səviyyəli Strateji Əməkdaşlıq Şurasının iclasının uğurla keçdiyini və əlaqələrin ən yüksək səviyyəyə çatdığını bildirib.

İki ölkə arasında ticarət və iqtisadi sahədə müəyyən edilmiş hədəflərə çatmaq üçün qətiyyətli olduqlarını vurğulayan Subianto, Türkiyə ilə İndoneziyanın balanslı və qarşılıqlı faydalı əməkdaşlıq qurduğunu deyib. Müdafiə sənayesi sahəsində əməkdaşlığa xüsusi önəm verdiklərini qeyd edərək, hərbi təhsil və kəşfiyyat sahəsində də əlaqələri gücləndirmək niyyətində olduqlarını bildirib.

Sağlamlıq və istehsal sektorunda mühüm qərarların alındığını vurğulayan Subianto, Fələstin məsələsində əməkdaşlığın davam edəcəyini və iki dövlətli həll yolunun dəstəkləndiyini qeyd edib. Eyni zamanda, Türkiyə ilə İndoneziyanın Ukrayna və Suriya məsələlərində də ortaq mövqeyə malik olduğunu ifadə edib.

Ərdoğanın səfərini məhsuldar və əhəmiyyətli hesab edən Subianto, bu görüşün iki ölkə arasındakı əməkdaşlığın gələcəyinə mühüm töhfə verəcəyinə inandığını bildirib. O, 2050-ci ilin İndoneziya-Türkiyə tərəfdaşlığının 100-cü ildönümünə hazırlıq baxımından mühüm bir mərhələ olduğunu vurğulayıb.